Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 315 Hüküm no: 393 Orijinal metin no: [63b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yanaki v. Kazaz’ın İstemad v. Dimo aleyhindeki alacak davasında sulh olunduğu Bakkal tâifesinden Yanaki v. Kazaz nâm zimmî mahfil-i kazâda işbu bâ‘isü’l-kitâb İstemad v. Dimo nâm muvâcehesinde ikrâr ve i‘tirâf edip mahmiye-i İstanbul’da Eğrikapı dâhilinde Yatağan Çeşmesi nâm mevzi‘de vâki‘ bakkal dükkânımda destgâhtar olup gāib ani’l-meclis olan Hristo nâm zimmîden zuhûr eden zarara, mezbûr İstemad emr ve kabûlü hâviye kefâlet ile kefîl olmuşidi hâlâ mezbûr Hristo sermâyemden [beş] bin mikdârı nakd-i râyic fi’l-vakt akçemi ahz eyleyip firâr etmekle mezbûr İstemad’dan da‘vâ ve taleb eylediğimde beynimizde küllî münâza‘a vâkı‘a olmuşidi el-hâletü hâzihî mâbeynimize muslihûn tavassut eyleyip husûs-ı mezbûrede beni bedel-i sulh iki bin dört yüz akçe üzerine sulh eylediklerinde ben dahi sulh-i mezbûru kabûl ve bedel-i sulh olan iki bin dört yüz akçeyi mezbûr İstemad yedinden bi’t-tamâm ve’l-kemâl ahz ve kabz eyleyip zikr olunan beş bin akçeye müte‘allik da‘vâdan mezbûrân İstemad ve Hristo’nun zimmetlerini ibrâ-i âmm-ı kātı‘ü’n-nizâ‘ ile ibrâ ve iskāt eyleyip mezbûr Hristo’nun dükkânımda bey‘ olunan metâ‘a müte‘allik zuhûr eden deynini ashâb-ı hukūka edâya ben müte‘ahhide olmuşidim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’l-yevmi’l-ışrîn min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Cafer b. Abdullah, Mustafa Çelebi b. Veli, Ali b. Abdullah, Devlo v. Dimitri, Peti v. Yorgi, Manol Tüccâr, Lambo Mumcu ve gayruhüm.