Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 315 Hüküm no: 394 Orijinal metin no: [63b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Abdullah’ın menzilini Hacı Sefer b. Abdullah’a sattığı Medîne-i Hazret-i Ebî Eyyûb el-Ensârî mahallâtından Yâvedûd mahallesinde sâkine Fâtıma bt. Abdullah nâm hâtun mahfil-i kazâda işbu hâmilü’l-kitâb el-Hâc Sefer b. Abdullah tarafından ikrâr-ı âti’z-zikri tasdîka vekîl olup hasm-ı câhid mahzarında Mehmed b. Ramazan ve Ali b. Abdullah şehâdetleri ile vekâleti sâbite olan Dilâver Ağa b. Abdullah mahzarında ikrâr ve i‘tirâf edip mahalle-i merkūmede vâki‘ bir tarafı Mehmed b. Ahmed mülkü ve bir tarafı cidâr-ı hısn ve bir tarafı Râziye Hâtun bt. Abdullah mülkü ve bir tarafı tarîk-i âm ile mahdûd olup bir bâb fevkānî odayı ve sofayı ve kenîfi ve bi’r-i mâ ve cüneyneyi müştemil olan mülk menzilimi, mezbûr el-Hâc Sefer’e fıddî nakd-i râyic fi’l-vakt sekiz bin beş yüz akçe ile hîn-i akidde müşârün-ileyh[in] olup ba‘de’l-kabz meclis-i akidde mudî‘a adedi nâ-ma‘lûm bir kabza fülûsa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm eyledikden sonra semen-i mezbûru yedinden bi’t-tamâm ve’l-kemâl ahz ve kabz eyledim dedikde vekîl-i mezbûr Dilâver Ağa vicâhen ve şifâhen tasdîk ve tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Es-Seyyid İsmail Çelebi b. es-Seyyid Ahmed, İbrahim [b.] Mustafa, Usta Rıdvan b. Abdullah, Receb b. Mustafa, Hüseyin b. ( ), Yakub b. Kurd, Mustafa b. Veli ve gayruhüm.