Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 316 Hüküm no: 395 Orijinal metin no: [63b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Dimo’nun harman yerini Dimo v. Yorgi’ye sattığı Vilâyet-i Rumeli’nde Badracık kazâsına tâbi‘ Mavril nâm karye sâkinlerinden Yani v. Dimo nâm zimmî meclis-i şer‘-i hatîr-i lâzımü’t-tevkīrde işbu hâmilü’s-sifr Dimo v. Yorgi nâm zimmî muvâcehesinde bi’t-tav‘i’s-sâf ikrâr ve i‘tirâf edip karye-i mezbûrede vâki‘ bir tarafdan Yorgi v. Todori mülkü ve bir tarafdan Yani v. Todori mülkü ve bir tarafdan Dimo v. Aleksi nâm zimmî tasarrufunda olan tarla ve bir tarafdan tarîk-i âm ile mahdûd bir kıt‘a harman yerimin mezbûr Dimo’ya hakk-ı tasarrufunu, sâhib-i arz ma‘rifetiyle iki yüz elli akçe mukābelesinde tefvîz edip ol dahi vech-i meşrûh üzre tefevvuz ve kabûl eyledikden sonra bedel-i tefvîz olan iki yüz elli akçeyi bi’t-tamâm ve’l-kemâl mezbûr Dimo yedinden ahz ve kabz edip zikr olunan harman yerini mahallinde zabt ve tasarrufa mezbûr Dimo’yu taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Târihuhü’l-mezbûr. Şuhûdü’l-hâl: Mustafa b. Kurd, Mustafa b. Veli, Ali b. Abdullah, Yani v. Riga, Nikola v. Riga, Nikola v. Todori, Petro [v.] Mihal, Yani [v.] Dimo, Todori v. Mihal, Yorgi v. Todori ve gayruhüm.