Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 316 Hüküm no: 396 Orijinal metin no: [64a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. İstefani’nin Ali Bey b. Mehmed’de alacağı olduğu Mahmiye-i Kostantıniyye’de Atmeydanı kurbunda Fîruz Ağa mahallesinde sâkin Yorgi v. İstefani nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Ali Bey b. Mehmed el-Cündî mahzarında ikrâr ve takrîr-i kelâm edip mezbûr Ali Bey zimmetinde samur kürk bahâsından yirmi dört bin akçe hakkım olup meblağ-ı mezbûrdan dokuz bin beş yüz akçeye kahve rengi sansar paçası kürklü bir muvahhidî çuka ferâce ve dört bin akçeye bir re’s kır bârgir alıp kabz edip on üç bin beş yüz akçesini vech-i meşrûh üzre kabz edip zimmetinde bâkī cem‘an on bin beş yüz akçe hakkım kaldı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’l-ışrîn min şehri Şevvâli’l-mükerrem li sene seb‘a ve erba‘în ve elf. Şuhûdü’l-hâl: İbrahim Beşe b. Mustafa, Ömer Çelebi b. Ahmed, Aslan b. Mahmud, Mustafa Çavuş b. Abdullah el-Mübâşir, Receb Efendi b. Abdi, Ali b. Abdullah.