Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 317 Hüküm no: 397 Orijinal metin no: [64a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ali’nin veraset davasının reddi Mahmiye-i Kostantıniyye hısnı ebvâbından Unkapanı kapısı dâhilinde Harâccı mahallesinde sâkin Mehmed b. Ali nâm kimesne mahfil-i kazâda mahmiye-i mezbûrede Küçükpazar kurbunda Arabacılar Meydanı demekle ma‘rûf mahallede sâkine olup li ebeveyn karındaşı olduğunu iddi‘â eylediği Kerime bt. Ali nâm hâtun muvâcehesinde üzerine takrîr-i da‘vâ edip ammim Mustafa nâm kimesnenin sulbiye kızı Âişe nâm hâtun vefât eyledikde terekesinin nısfı zevci Ömer b. Musa nâm kimesneye ve nısf-ı âharı alâ tarîki’l-usûbeti’n-nesebiyye bana intikāl etmişiken ben yirmi seneden mütecâviz dârü’l-harbde esîr olup hâzır olmağla kız karındaşım mezbûre Kerime ammim kızı mezbûre Âişe’nin terekesinden bana isâbet eden nısf hisse-i şâyi‘ayı kabz eylemiş suâl olunup bi hasebi’ş-şer‘i’ş-şerîf ihkāk-ı hak olunmak matlûbumdur dedikde gıbbe’s-suâl mezbûre Kerime cevâbında, ammim kızı merkūme Âişe vefât edip verâseti zevci merkūm Ömer’e ve bana münhasıra olmağla bana intikāl edip mezbûr Mehmed benim karındaşım değildir ve kim olduğu dahi ma‘lûmum değildir deyip bi’l-külliye inkâr ile cevâb vericek müdde‘î-i merkūm Mehmed’den müdde‘âsına mutâbık beyyine taleb olundukda, mehil-i şer‘î ile imhâl olundukdan sonra beyyineden âciz olup da‘vâ-yı nesebden kat‘-ı nazar kabz eylediği nısf terekeye merkūm Mehmed müstahık idiğini bilmediğine mezbûr Kerime’yi istihlâf etmeğin mezbûre Kerime dahi alâ vefki’l-mes’ûl yemîn billâhi’l-aliyyi’l-azîm edip kendisi mezbûr Mehmed’e min ba‘d karâbet ve neseb iddi‘â edersem lede’l-hükkâm mesmû‘a ve makbûle olmasın deyicek mâ hüve’l-vâki‘ gıbbe’t-taleb ketb olundu. Tahrîren fi’l-yevmi’l-ışrîn min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Mahmud Hoca b. Ali, Veli Halîfe b. Ali el-Müezzin, Receb Efendi b. Abdi, Mahmud b. Ahmed, Ali b. Mustafa, Mustafa b. Veli, Abdülkādir Çelebi b. Mehmed Efendi, Mustafa Çelebi b. İsa.