Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 318 Hüküm no: 398 Orijinal metin no: [64a-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Mahmud b. Seyyid Hüseyin’in evini istiğlâl yoluyla Halime bt. Abdülfettah Efendi’ye sattığı Mahmiye-i Kostantıniyye dâhil-i bâb-ı Ebî Eyyûb el-Ensârî mahallâtından Mustafa Paşa-yı Atîk mahallesinde sâkin olan Seyyid Mahmud b. Seyyid Hüseyin nâm kimesne, meclis-i şer‘-i şerîf ve mahfil-i dîn-i münîfde -el-masûn ani’t-tağyîr ve’t-tahrîf- hâzır olup âtiyyü’z-zikr menzilini Halime bt. Abdülfettâh Efendi nâm sagīrenin tesviye-i umûru için kıbel-i şer‘-i şerîfden vasiyy-i mansûb olan hâmil-i hâze’l-kitâb Mehmed Çelebi b. Ramazan’a bey‘ ettiğini ikrâr ve i‘tirâf etti. Vasiyy-i mezbûr da sagīre-i mezbûre malıyla ve istiğlâl maksadıyla, mezbûr Seyyid Mahmud’un işbu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu mahalle-i mezbûrede kâin bulunan bir tarafdan menzil-i mevkūf, iki tarafdan Mustafa Paşa vakfı’na âid menzil, diğer tarafdan da tarîk-i âm ile mahdûd olan cemî‘-i menzili cümle tevâbi‘ ve levâhıkı ve kâffe-i menâfi‘ ve merâfıkı ile râyicü’l-vakt on iki bin akçe semen-i mu‘ayyen-i makbûzla iştirâ etti. Bâyi‘-i mezbûrun menzili kirâlamak istemesi üzerine vasiyy-i merkūm, ba‘de’t-tahliyye ve’t-tekābuz zeylde mezkûr ayın gurresinden üç sene tamâmına beş bin dört yüz akçe ücret ile menzil-i mezbûru kirâya verdi. Vasiyy-i mezbûr, vâki‘ ikrârı vicâhen ve şifâhen tasdîk etti. Sonra mahalle-i mezbûre sükkânından Ömer Beşe b. Abdullah, müezzin İbrahim b. Hüdâverdi ve Mehmed b. Yusuf nâm kimesnelerin her biri, menzil-i mezbûrun derkine ve ücret-i merkūmeye îcâb ve kabûlü hâvî kefâletle kefîl oldu. Cerâ zâlike ve hurrire fî gurreti Şevvâli’l-mükerrem sene seb‘a ve erba‘în ve elf. Şuhûdü’l-hâl: Kadı Abdülbâkī Efendi b. Hasan, Şeyh Mehmed Efendi b. Pîrî, müezzin Murtaza Halîfe b. Mehmed, kâtib Hüseyin Çelebi, Keyvan b. Abdullah, Yusuf b. Abdullah, Ahmed Çelebi b. Mehmed, Şeyhî Çelebi b. ( ), Mahmud b. Ahmed