Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 319 Hüküm no: 400 Orijinal metin no: [64b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Panayot v. Nikola’nın tarlasını Dimitri v. Maskolyo’ya sattığı Vilâyet-i Rumeli’nde Yenişehir kazâsı müzâfâtından Kûhistan nâhiyesine tâbi‘ Fraksite nâm karye sâkinlerinden Panayot v. Nikola nâm zimmî meclis-i şer‘-i hatîr-i lâzımü’t-tevkīrde işbu hâmilü’s-sifr Dimitri v. Maskolyo nâm zimmî muvâcehesinde bi’t-tav‘i’s-sâf ikrâr ve i‘tirâf edip karye-i mezbûre hudûdu dâhilinde Mazı nâm mevzi‘de vâki‘ bir tarafdan İsteraki v. Şimo Tarlası ve bir tarafdan Nikola v. Kosta tarlası ve iki tarafdan dere ile mahdûd tahmînen elli keyl tohum istî‘âb eder taht-ı tasarrufumda olan bir kıt‘a tarlamın hakk-ı tasarrufunu, sâhib-i arz ma‘rifetiyle mezbûr Dimitri’ye üç bin nakd-i râyic fi’l-vakt akçe mukābelesinde tefvîz edip ol dahi vech-i meşrûh üzre tefevvuz ve kabûl eyledikden sonra bedel-i tefvîz olan üç bin akçeyi bi’t-tamâm ve’l-kemâl mezbûr Dimitri yedinden ahz ve kabz edip sâlifü’z-zikr tarlamı mahallinde zabt ve tasarrufa mezbûr Dimitri’yi taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sânî ve’l-ışrîn min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Mustafa b. Veli, Yakub b. Kurd, Cafer b. Abdullah, Tanaşi [v.] Yorgi, Dimitri [v.] Yani, Trandafilo, Trandafilo v. Todori, Atanaş v. Dimitri, İstemad v. Todori, Angilaki v. Franko, Tanaşi v. Yorgi, Yani v. Kosta.