Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 319 Hüküm no: 401 Orijinal metin no: [64b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Hasan ile kardeşlerinin, Şâhî Hatun Vakfı’ndan vazife bedellerini aldıkları Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-’de medfûn olan merhûm Şâhî Hâtun nâm sâhibü’l-hayrın evlâdından olup vilâyet-i Anadolu’da Bayburd-ı Erzurum kazâsına tâbi‘ Billur nâm karyeden Mehmed b. Hasan nâm kimesne kendi tarafından asâleten ve li ebeveyn karındaşları Yusuf ve Belkıs ve Sâliha ve Fâtıma taraflarından dahi husûs-ı âti’z-zikre vekîl olup hasm-ı câhid mahzarında nakl-i şer‘î ile vekâleti sâbite oldukdan sonra vekâleten mahfil-i kazâda merhûme Şâhî Hâtun’un medîne-i mezbûrede olan evkāfına mütevellî olan ashâb-ı hâze’l-kitâb Şaban Halîfe b. Kenan ve mürtezikasından Bağdâdî Ahmed Efendi b. Mahmud en-Nâzır ve Ömer Efendi b. el-merhûm Abdülkādir ve Veli Halîfe b. Abdünnebi ve Ali Çelebi el-Müezzin ve Hüseyin Çelebi el-Müezzin ve Hasan Efendi b. Abdi ve Bayram Efendi ve Mustafa Halîfe b. Yunus ve Mahmud b. Hasan ve Mehmed b. Kalender mahzarlarında ikrâr-ı tâm ve takrîr-i kelâm edip vâkıfe-i mezbûre Şâhî Hâtun medîne-i merkūmede olan evkāfının gallesinden evlâdına ta‘yîn eylediği beher yevm onar akçe vazîfemizden mütevellî-i sâbık İbrahim zamânında bir buçuk senede tecemmü‘ eden beş bin dört yüz akçe ve Bayram [nâm] kimesne zamânında dahi bi hakkın senede tecemmü‘ eden bin sekiz yüz akçe ve mezbûr Şaban Halîfe zamânında dahi târih-i kitâba gelince iki senede tecemmü‘ eden yedi bin iki yüz akçe ki cem‘an on dört bin dört yüz akçe vazîfemiz vakf-ı merkūmda mürtezika-i vakf kâmil vazîfe almağa müsâ‘id olmayıp tevzî‘ tarîkiyle verilmek lâzım iken biz hâzır olmamağla mastûrü’l-esâmî olan mürtezika-i vakf her biri kâmil vazîfe almağla zimmetlerine geçmiş idi hâlâ gelip ben dahi mezbûrlardan dört senede vech-i meşrûh üzre müstahık olduğumuz vazîfemizi her birinden taleb-i da‘vâ eylediğimde zikr olunan dört senede cümle mürtezika-i vakfın tevzî‘ tarîkiyle müstahık oldukları vazîfeleri hesâb olundukda, bizim dahi on dört bin dört yüz akçe vazîfemiz mukābelesinde hesâb-ı mezkûr üzre hissemize yedi bin akçe isâbet edip meblağ-ı mezbûr yedi bin akçeyi mezbûrların vazîfe-i âtiyelerine hesâb etmek üzre cümlesinin ma‘rifet ve izinleri mütevellî-i merkūm Şaban Halîfe yedinden bi’t-tamâm alıp kabz ve tesellüm eyleyip işbu târih-i kitâb Şevvâli gurresine gelince vakıfdan eğer benim ve eğer müvekkillerimin vazîfemize müte‘allik bir akçe ve bir habbe hakkımız bâkī kalmadı dedikde mukırr-ı mezbûr Mehmed’in minvâl-i meşrûh üzre bi’l-asâle ve bi’l-vekâle cârî ve sâdır olan ikrârını mütevellî-i merkūm Şaban Halîfe ve mastûrül-esâmî olan mürtezika-i vakf [65a] bi ecma‘ihim bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ gıbbe’t-taleb ketb olundu. Fi’l-yevmi’s-sânî aşer min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Mustafa Çavuş b. el-merhûm Halil, Receb Efendi b. Abdi, Mustafa Çelebi [b.] Mehmed, Mustafa Çelebi b. el-Hâc İsa, Mustafa Efendi, Mustafa b. Veli, Siyâmi Efendi b. Tahir, Abdülkādir b. Mehmed el-fakīr ve gayruhüm.