Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 320 Hüküm no: 402 Orijinal metin no: [65a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emin Mustafa Çelebi Vakfı’na ait menzilin kiraya verilmesi Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-’de vâki‘ merhûm Emin Mustafa Çelebi nâm sâhibü’l-hayrın evkāfına bi’l-fi‘l mütevellî olan Halil Halîfe b. Mehmed meclis-i şer‘-i hatîr-i lâzımü’t-tevkīrde fahrü’l-muhadderât zahrü’l-muvakkarât sâhibetü hâze’l-kitâb Rukiye Hâtun bt. el-mevlâ el-merhûm şeyhülislâm fî zamânihî müfti’l-enâm fî evânihî Esad Efendi taraf-ı âlîlerinden husûs-ı âti’z-zikre vekîl olup hasm-ı câhid mahzarında müşârün-ileyhâyı ma‘rifet-i şer‘iyye ile ârifeyn olan Hasan Efendi b. el-Hâc Ali ve Ahmed Efendi b. Cafer şehâdetleri ile şer‘an vekâleti sâbite olan Osman Çavuş b. Yahya mahzarında ikrâr-ı tâm ve takrîr-i kelâm edip evkāf-ı mezbûreden olup medîne-i merkūme mahallâtından Yunus Paşa mahallesinde vâki‘ arsasında vâki‘ arsasının beher sene Hazret-i Ebî Eyyûb el-Ensârî evkāfı’na kırkar akçe mukāta‘ası olup, bir tarafı İbrahim Çavuş mülkü ve bir tarafı Kasım Paşa vakfı ve bir tarafı sâhil-i bahr ve bir tarafı tarîk-i âm ile mahdûd üç bâb fevkānî odaları ve dehlizleri ve deryâ üstünde iki mahzeni müştemil olan vakıf menzile icâre-i mu‘accele ve yevmî üçer akçe icâre-i müeccele ile merhûm Ahîzâde Hüseyin Efendi mutasarrıf iken müteveffâ oldukda, hakk-ı tasarrufu kerîmeleri Şerife Ümmülhayr Hâtun ile Râbia nâm sagīresine ve sulbî oğulları Mehmed Efendi’ye intikāl edip mûmâ-ileyh Mehmed Efendi dahi bilâ-veled müteveffâ oldukda menzil-i mezbûrdan mutasarrıf oldukları sülüs hisse-i şâyi‘aları mahlûl olup hâlâ cânib-i vakfa intikāl etmeğin menzil-i mezbûrun zikr olunan sülüs şâyi‘inin hakk-ı tasarrufunu müteveffâ-yı mûmâ-ileyh eş-Şerîf Mehmed Efendi mahlûlünden yevmî bir akçe icâre-i müeccele ve iki bin altı yüz nakd-i râyic fi’l-vakt fıddî akçe icâre-i mu‘accele ile cânib-i vakıfdan merhûm Osman Çavuş’a îcâr eyleyip ol dahi müvekkilesi müşârün-ileyhâ Rukiye Hâtun için vekâleten vech-i tahrîr üzre istîcâr ve kabûl eyledikden sonra meblağ-ı mezbûr iki bin altı yüz akçeyi yedinden bi’t-tamâm ve’l-kemâl ahz ve kabz eyleyip yedine imzâ ve hatmi müştemil vech-i meşrûh üzre temessük verdim. Ba‘de’l-yevm menzil-i mezbûrun zikr olunan sülüs-i şâyi‘i müşârün-ileyhâ Rukiye Hâtun’un minvâl-i muharrer üzre dâhil-i taht-ı tasarrufu olmuşdur dedikde mütevellî-i merkūmun ber vech-i meşrûh cârî ve sâdır olan ikrâr ve takrîrini mezbûr Osman Çavuş bi’l-vekâle vicâhen tasdîk ve şifâhen tahkīk etmeğin mâ hüve’l-vâki‘ gıbbe’t-taleb ketb olundu. Fi’l-yevmi’l-hâmis aşer min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Müderrisîni’l-kirâm Hasan Efendi b. Mehmed Efendi eş-şehîr Âsımzâde, Fahrü’l-müderrisîn Mehmed Efendi, Fahrü’l-kuzât Mehmed Efendi b. el-merhûm eş-Şeyh Süleyman, Receb Efendi b. Abdi, Hüseyin Efendi b. Ali, Mehmed Halîfe b. Bayram, Bayram b. Ferhad, Mustafa Çelebi b. Yusuf, Mustafa b. Receb, İbrahim Halîfe b. Ebûbekir, Ahmed Halîfe b. İbrahim, Veli Halîfe b. Abdülganî, Şaban Halîfe b. Kenan, Mustafa Çelebi b. Mehmed sâ‘atî, Mustafa Çelebi b. Veli Ağa, Muharrirü’l-hurûf Abdülkādir el-Eyyûbî.