Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 322 Hüküm no: 403 Orijinal metin no: [65a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şerife Ümmülhayr Hatun ve Rabia Hatun bt. Ahizâde Hüseyin Efendi’nin menzil hisselerini Rukiye bt. Esad Efendi’ye sattıkları Bundan akdem dâric-i medâric-i rahmet-i Rahmân olan Ahîzâde Hüseyin Efendi merhûmun verâseti kerîme-i muhteremeleri fahrü’l-muhadderât Şerife Ümmülhayr Hâtun ile Râbia nâm sagīresine ve sâbıkan merhûm olan mahdûm-ı mükerremleri eş-Şerîf Mehmed Efendi’ye münhasıra olduğu şer‘an mütebeyyin ve medîne-i Hazret-i Ebî Eyyûb el-Ensârî -radiye anhu Rabbühü’l-Bârî-’de vâki‘ arsasının hazret-i mûmâ-ileyh vakfına beher sene kırkar akçe mukāta‘ası olup merhûm Emin Mustafa Çelebi nâm sâhibü’l-hayrın evkāfından icâre-i mu‘accele ve yevmî üçer akçe icâre-i müeccele ile merhûm-ı müşârün-ileyh Hüseyin Efendi tasarrufunda olan medîne-i mezbûre mahallâtından Yunus Paşa mahallesinde vâki‘ bir tarafı İbrahim Çavuş mülkü ve bir tarafı merhûm Kasım Paşa vakfı ve bir tarafı sâhil-i bahr ve bir tarafı tarîk-i âm ile mahdûd üç bâb fevkānî odaları ve dehlizleri ve deryâ üstünde iki mahzeni müştemil vakıf menzilin hakk-ı tasarrufunun sülüsânı müşârün-ileyhâ Şerife Ümmülhayr ile sagīre-i mezbûre Râbia’ya ve sülüsü dahi merhûm-ı mezbûr eş-Şerîf Mehmed Efendi’ye intikāl-i âdî ile intikāl eylediği mütebeyyin oldukdan sonra sagīre-i mezbûre Râbia’nın tesviye-i umûruna kıbel-i şer‘den mansûb vasîsi ve mûmâ-ileyhâ Şerife Ümmülhayr tarafından dahi husûs-ı âti’z-zikre vekîl olup hasm-ı câhid mahzarında müşârün-ileyhâyı ma‘rifet-i şer‘iyye ile ârifeyn olan İbrahim b. Abdullah ve Ali b. Abdullah şehâdetleri ile şer‘an vekâleti sâbite olan Nasuh Çavuş b. Ahmed mahfil-i kazâda kıdvetü’l-muhadderât zübdetü’l-muvakkarât sâhibetü hâze’l-kitâb Rukiye Hâtun bt. el-mevlâ’l-merhûm şeyhülislâm fî zamânihî, müfti’l-enâm fî evânihî Esad Efendi taraf-ı âlîlerinden kezâlik husûs-ı âti’z-zikre vekîl olup [65b] hasm-ı câhid mahzarında müşârün-ileyhâyı ma‘rifet-i şer‘iyye ile ârifeyn olan Hasan Efendi b. el-Hâc Ali ve Ahmed Efendi b. Cafer şehâdetleri ile şer‘an vekâleti sâbite olan Osman Çavuş b. Yahya mahzarında bi’l-vekâle ve bi’l-vesâye ikrâr-ı tâm ve takrîr-i kelâm edip menzil-i mezbûrdan müşârün-ileyhâ Şerife Ümmülhayr ile sagīre-i mezbûre Râbia mutasarrıfe oldukları sülüsân hisse-i mu‘ayyeneleri harâba müşrif olup kābil-i süknâ olmadığından mâ‘adâ imâret ve meremmetine aczleri olup mürûr-ı eyyâm ile bi’l-külliye intifâ‘dan kalması muhakkak olmağla bir mikdâr bedel ile âhara tefvîz olunması sagīre-i mezbûre hakkında dahi enfa‘ [ve] evlâ olmağın menzil-i mezbûrdan mûmâ-ileyhimâ Şerife Ümmülhayr ile sagīre-i mezbûre Râbia tasarruflarında olan sülüsân hisse-i şâyi‘anın hakk-ı tasarrufunu yedi bin üç yüz nakd-i râyic fi’l-vakt fıddî akçe bedel ve yevmî iki akçe icâre-i müeccele ile mezbûr Osman Çavuş’a bi’l-fi‘l vakf-ı mezbûr mütevellîsi olan işbu hâzır bi’l-meclis Halil Halîfe b. Mehmed ma‘rifetiyle tefvîz edip ol dahi müvekkilesi müşârün-ileyhâ Rukiye Hâtun için vech-i muharrer üzre tefevvuz ve kabûl eyledikden sonra mukābele-i tefvîz olan meblağ-ı merkūm yedi bin üç yüz akçeyi vekâletim ve vesâyetim hasebiyle merkūm Osman yedinden bi’t-tamâm ve’l-kemâl ahz ve kabz eyledim ba‘de’l-yevm menzil-i mezbûrdan zikr olunan sülüsân hisse mûmâ-ileyhâ Rukiye Hâtun’un dâhil-i taht-ı tasarrufu olmuşdur dedikde merkūm Nasuh Çavuş’un minvâl-i meşrûh üzre bi’l-vekâle ve bi’l-vesâye cârî ve sâdır olan ikrâr ve takrîrini vekîl-i âhar mezbûr Osman Çavuş bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’t-taleb ketb olundu. Târihuhü’l-mezbûr. Şuhûdü’l-hâl: Es-Sâbikūn.