Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 323 Hüküm no: 404 Orijinal metin no: [65b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Arslan’ın Hacı Mesud b. Abdülmelik’e olan borcunu ödemesi Mahmiye-i Kostantıniyye hısnı ebvâbından Balatkapısı hâricinde sâkin el-Hâc Mesud b. Abdülmelik nâm kimesne meclis-i şer‘de, Mehmed b. Arslan nâm Kıbtîyi ihzâr ve mahzarında üzerine takrîr-i da‘vâ edip mezbûr Mehmed’e ve gāib ani’l-meclis olan diğer Mehmed’e ve Sefer nâm kimesneye iki yüz vakıyye enseri kesivermek için Balat çarşısı’nda târih-i kitâbdan sekiz gün mukaddem ale’l-iştirâk yirmi dört aded riyâlî guruş ve sekiz yüz nakd-i râyic fi’l-vakt fıddî akçe def‘ ve teslîm etmiş idim enseriyi bana kesivermediler suâl olunup meblağ-ı mezbûr alıverilmek matlûbumdur dedikde gıbbe’s-suâl mezbûr Mehmed husûs-ı mezbûru bi’l-külliye inkâr ile cevâb verip müdde‘î-i mezbûr el-Hâc Mesud’dan müdde‘âsına mutâbık beyyine taleb olundukda udûl-i müslimînden Balat mahallesi sâkinlerinden Mehmed Çelebi b. Kasım ve el-Hâc Yakub b. Abdullah nâm kimesne li ecli’ş-şehâde meclis-i şer‘a hâzırân olup istişhâd olunduklarında her biri edâ-i şehâdet-i şer‘iyye edip fi’l-vâki‘ târih-i kitâbdan sekiz gün mukaddem mezbûr el-Hâc Mesud Balat çarşısı’nda mezbûr Mehmed’e gāib ani’l-meclis olan diğer Mehmed ve Sefer nâm kimesnelere iki yüz vakıyye enseri kesivermek için bizim huzûrumuzda yirmi dört aded riyâlî guruş ile sekiz yüz nakid hurda akçe def‘ ve teslîm eyledi mezbûrûn dahi meblağ-ı mezbûru mezbûr el-Hâc Mesud yedinden ale’l-iştirâk ahz ve kabz eylediler. Husûs-ı mezbûra minvâl-i muharrer üzre biz şâhidleriz şehâdet dahi ederiz dediklerinde gıbbe ri‘âyeti şerâiti’l-kabûl şehâdetleri makbûle olmağın, mezbûr Mehmed’in zimmetine lâzım gelen sekiz riyâlî guruş ile iki yüz altmış yedi akçeyi edâya tenbîh birle mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Mahmud b. Ahmed, Ali b. Abdullah, Cafer b. Abdullah, Receb Efendi b. Abdi, Mustafa b. Veli, Mehmed b. Hamza, Hüseyin b. Hasan.