Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 324 Hüküm no: 405 Orijinal metin no: [65b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mihayil v. Mihran’ın Murat v. Sadak’da olan alacağını tahsil ettiği Havâss-ı Aliyye kazâsı müzâfâtından Hasköy’de Pîrî Paşa mahallesinde sâkin Mihayil v. Mirhan nâm Ermeni mahfil-i kazâda işbu hâmilü’s-sifr Murat v. Sadak nâm Ermeni muvâcehesinde ikrâr-ı tâm ve takrîr-i kelâm edip mezbûr Murat’a târih-i kitâbdan on beş sene mukaddem karz-ı hasen yüz aded riyâlî guruş vermiş idim hâlâ taleb-i da‘vâ eylediğimde inkâr etmekle beynimizde münâza‘ât-ı kesîre ve muhâsamât-ı adîde vâkı‘a olmuşidi el-hâletü hâzihî es-sulhu seyyidü’l-ahkâm muktezâsınca mâbeynimizde muslihûn tavassut edip husûs-ı mezbûrdan beni otuz riyâlî guruş üzerine sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr otuz riyâlî guruşu bi’t-tamâm ve’l-kemâl mezbûr Murat yedinden ahz ve kabz edip husûs-ı mezbûra müte‘allik da‘vâdan mezbûr Murat’ın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim ba‘de’l-yevm benden bi’z-zât ve bi’l-vâsıta husûs-ı mezbûra müte‘allik da‘vâ ve nizâ‘ sudûr ve zuhûr ederse lede’l-hükkâmı zevi’l-ihtirâm mesmû‘a ve makbûle olmasın dedikde mukırr-ı mezbûr Mihayil’in vech-i meşrûh üzre cârî olan ikrârını mezbûr Murat bi’l-muvâcehe tasdîk etmeğin mâ vaka‘a gıbbe’t-taleb ketb olundu. Tahrîren fi’l-yevmi’s-sâlis ve’l-ışrîn min Şevvâli’l-mükerrem li sene seb‘a ve erba‘în ve elf. Şuhûdü’l-hâl: Receb Efendi b. Abdi, Ali b. Abdullah, Safer b. Abdullah, Mustafa b. Veli, Haçador v. Mirhayen, Azar v. Bolar.