Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 326 Hüküm no: 409 Orijinal metin no: [66a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Abdullah’ın tasarrufundaki menzili Meryem bt. Abdullah’a devrettiği Medîne-i Hazret-i Ebî Eyyûb el-Ensârî mahallâtından Çavuş Kasım mahallesinde vâki‘ iki tarafdan merhûme Mehlika Hâtun vakfı ve bir tarafdan merhûm el-Hâc Sefer vakfı ve bir tarafdan tarîk-i âm ile mahdûd iki bâb tahtânî beyti ve kenîfi ve muhavvata-i zât-ı eşcâr-ı müsmire ve gayr-ı müsmiremi müştemil merhûme Mehlika Hâtun nâm sâhibü’l-hayrât vakf ve menâfi‘ini mahalle-i mezbûre mescid-i şerîfi imâmına şart eylediği menzile icâre-i mu‘accele ve her ay [66b] on beş akçe icâre-i müeccele ile mutasarrıf olan Hasan b. Abdullah nâm kimesne mahfil-i kazâda işbu hâmiletü’l-kitâb Meryem bt. Abdullah nâm hâtun mahzarında bi tav‘ihî ikrâr ve takrîr-i kelâm edip menzil-i mezbûrda olan hakk-ı süknâmı vakf-ı mezbûr mütevellîsi olan Hüseyin Efendi b. Mehmed el-İmâm ma‘rifetiyle mezbûre Meryem’e hüsn-i ihtiyârım ile üç bin akçe bedel ile ferâğ eyledikden sonra bedel-i mezbûr üç bin akçeyi mezbûre Meryem yedinden bi’t-tamâm ahz ve kabz edip menzil-i mezbûru teslîm eyledim dedikde gıbbe’t-tasdîk mâ vaka‘a bi’t-taleb ketb olundu. Tahrîren fi’l-yevmi’s-sâlis ve’l-ışrîn târihuhu’l-mezbûr. Şuhûdü’l-hâl: İshak Halîfe b. Veli el-İmâm, Mustafa Halîfe b. Şaban el-Müezzin, eş-Şeyh Mehmed Efendi, Derviş Beşe b. Ali er-Râcil, Mustafa Bey b. ( ) el-Cündî, Ahmed b. Zülfikār, Hüseyin b. Hakkı, Cafer b. Abdullah.