Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 377 Hüküm no: 487 Orijinal metin no: [78b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Yusuf b. Hasan’ın çiftlik, bağ ve tarlalarını Derviş Ağa b. Mehmed’e sattığı Medîne-i Hazret-i Ebî Eyyûb el-Ensârî mahallâtından Çavuş Kasım mahallesi sâkinlerinden el-Hâc Yusuf b. Hasan mahfil-i kazâda işbu hâmilü’l-kitâb Derviş Ağa b. Mehmed mahzarında bi’t-tav‘i’s-sâf ikrâr ve i‘tirâf edip Havâss-ı Refî‘a kazâsı müzâfâtından Terkos nâhiyesine tâbi‘ Çilingir nâm karyede vâki‘ bir tarafı kâtib Mustafa Çelebi mülkü ve bir tarafı Ali Beşe b. Cafer mülkü ve bir tarafı karye-i mezbûre mer‘âsı ve bir tarafı tarîk-i âm ile mahdûd bir bâb fevkānî odayı ve sundurmayı ve bir odalı ahırı ve muhavvata-i zât-ı eşcâr-ı müsmire-i mütenevvi‘ayı müştemil çiftlik ta‘bîr olunur mülk menzili ve çiftlik-i mezbûrda mevcûd olan dört re’s kara sığır öküzünü ve iki re’s su sığırı öküzünü ve sekiz re’s kara sığır ineğini ve üç buzağıyı ve üç kıt‘a mükemmel arabayı ve der-anbar üç müd buğdayı ve üç müd alef ve on araba samanı ve on dört kaz ve yedi ördek ve otuz tavuğu ve iki saban demirini ve mükemmel âlât ve esbâbı ile bir pulluğu ve beynimizde ilm-i şer‘î ile ma‘lûm olan sâir âlât-ı zirâ‘at ve esbâb-ı hırâseti ve karye-i mezbûre sınırında vâki‘ lede’l-ahâlî ve’l-cîrân ma‘lûmü’l-hudûd olan bir kıt‘a mülk bağımı mezbûr Derviş Ağa’ya fıddî nakd-i râyic fi’l-vakt kırk bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile bey‘ ve teslîm edip ol dahi vech-i meşrûh üzre iştirâ ve tesellüm eyledikden sonra kadîmden çiftlik-i mezbûr ile tasarruf olunur karye-i mezbûre sınırında vâki‘ sâhibü’l-me‘ârek ve’l-megāzî Ebü’l-feth Sultan Mehmed Gāzi evkāfı arâzisinden olup bir tarafdan Mehmed Ağa tarlası ve bir tarafdan Sinan Ağa tarlası ve bir tarafdan tarîk-i âm ile mahdûd bir kıt‘a tarla ve yine tarafeynden kâtib Mustafa Çelebi tarlası ve tarafeynden karye-i mezbûre mer‘âsı ile mahdûd bir kıt‘a tarla ve yine tarafeynden Süleyman Beşe çayırı ve bir tarafdan Ahmed Beşe çayırı ve tarafeynden İbrahim Beşe tarlası ile mahdûd bir kıt‘a tarla ve yine bir tarafdan Abdülbâkī Çelebi köprüsü ve bir tarafdan Müezzin oğlu tarlası ve bir tarafdan bî-zebân Çingene tarlası ve bir tarafdan tarîk-i âm ile mahdûd bir kıt‘a tarla ve yine karye-i mezbûre arâzisinde lede’l-ahâlî ve’l-cîrân ma‘lûmü’l-hudûd bir kıt‘a tarla ki cem‘an altı kıt‘a tarlalarımın dahi hakk-ı tasarrufları olmak üzre mütevellîsi ma‘rifetiyle mezbûr Derviş Ağa’ya mezbûrü’n-na‘t beş bin akçe mukābelesinde tefvîz edip ol dahi vech-i meşrûh üzre tefevvuz ve kabûl eyledikden sonra semen-i mezbûr kırk bin akçe ile bedel-i tefvîz olan beş bin akçe ki cem‘an kırk beş bin akçe eder meblağ-ı mezbûru merkūm Derviş Ağa yedinden bi’t-tamâm ve’l-kemâl ahz ve kabz eyledim ba‘de’l-yevm emlâk-i mezbûru merkūm Derviş Ağa’nın mülk-i müşterâsı ve mezâri‘-i merkūme dâhil-i taht-ı tasarrufu olmuşdur. Keyfe mâ yeşâ’ mutasarrıf olsun dedikde mukırr-ı mezbûr el-Hâc Yusuf’un minvâl-i meşrûh üzre cârî olan ikrârı el-mukarru lehü’l-merkūm Derviş Ağa vicâhen tasdîk ve tahkīk edicek mâ vaka‘a ketb olundu. Tahrîren fi’l-yevmi’r-râbi‘ aşer min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Ahmed Çelebi b. Yusuf, İbrahim Çelebi b. Mustafa, Mehmed Çelebi b. Muharrem, İbrahim Beşe b. Ali, Süleyman b. Abdullah, el-Hâc Rıdvan b. Abdullah, Mustafa b. Mehmed, Ali Çelebi b. Ahmed, Mustafa b. Mahmud ve gayruhüm.