Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 396 Hüküm no: 512 Orijinal metin no: [83b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Mehmed b. Mehmed’in vakıfdaki vazifesi için kaynatası İlyas Dede b. Hızır’ı vekil bıraktığı Zümre-i sâdâtdan es-Seyyid Mehmed b. es-Seyyid Mehmed meclis-i şer‘-i hatîr lâzımü’t-tevkīrde kayın atası işbu râfi‘ü’l-kitâb İlyas Dede b. Hızır muvâcehesinde bi’t-tav‘ ve’r-rızâ ikrâr ve i‘tirâf edip ben [sıla-i] rahm için vilâyetime gitmeğe teveccüh eylediğim ecilden Hazret-i Ebî Eyyûb el-Ensârî -radiye anhu Rabbühü’l-Bârî- evkāf-ı şerîfesinden evlâdiyyetim hasebiyle mutasarrıf olduğum yevmî otuz bir akçe vazîfemi beher mâh taraf-ı vakıfdan alıp zevcem Fâtıma Hâtun’un ve sulbî oğlum Mehmed nâm sagīrin nafaka ve kisveleri için harc ve sarfa tarafımdan mezbûr İlyas Dede’yi vekîl ve nâib-i menâb ta‘yîn eyledim dedikde mezbûr İlyas Dede dahi vekâlet-i merkūmeyi kabûl ve hizmet-i lâzımesin müte‘ahhid olmağın mâ hüve’l-vâki‘ gıbbe’t-taleb ketb olunup yed-i tâlibe def‘ olundu. Hurrire fi’l-yevmi’l-ışrîn min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Receb Efendi b. Abdi, Mehmed Çelebi b. ( ), Mustafa b. Receb, Mehmed b. ( ), Muharrirü’l-hurûf Mustafa ve gayruhüm.