Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 402 Hüküm no: 523 Orijinal metin no: [84b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Üveys’in oğulları Hasan ve Hızır Bey’in boş olan tarlalarını Pavlo v. İsteryano’ya sattıkları Vilâyet-i Rumeli’nde Yenişehir kazâsı müzâfâtından Fener nâhiyesinde ber vech-i iştirâk timara mutasarrıflar olup karındaşları olan Hasan Bey ve Hızır Bey ibney Üveys nâm kimesneler mahfil-i kazâda işbu bâ‘isü’l-kitâb Pavlo v. İsteryano nâm zimmî muvâcehesinde takrîr-i kelâm edip timar-ı mezbûr karyelerinden Hetse nâm karye sınırında vâki‘ bir tarafı Hristodoli tarlası ve bir tarafı vâdi ve bir tarafı Manol tarlası ve bir tarafı tarîk-i âm ile mahdûd olan bir kıt‘a tarla mahlûl olup bi hasebi’l-kānûn tapuya müstahak olmağın zikr olunan tarlanın hakk-ı tasarrufunu mezbûr Pavlo’ya tefvîz edip ol dahi tefevvuz ve kabûl eyledikden sonra mukābele-i tefvîzde yedinden dört yüz nakd-i râyic fi’l-vakt fıddî akçe resm-i tapusun alıp vech-i meşrûh üzre yedine imzâ ve hatmimizi müştemil temessük dahi verdik dediklerinde mezbûrân Hasan Bey ve Hızır Bey’in minvâl-i muharrer üzre cârî ve sâdır olan takrîrlerini mezbûr Pavlo vicâhen tasdîk ve şifâhen tahkīk etmeğin mâ hüve’l-vâki‘ gıbbe’t-taleb ketb olundu. Fi’l-yevmi’s-sâdis ve’l-ışrîn min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Şaban Beşe b. Ömer, Murad Çelebi b. Ahmed, Ali Beşe el-Muhzır, Yakub Çelebi b. Kurt, Yani v. Verso.