Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 403 Hüküm no: 524 Orijinal metin no: [84(2)a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman b. Mehmed’in evini Ahmed’e sattığı Medîne-i Hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Davud Ağa mahallesi sâkinlerinden Süleyman b. Mehmed meclis-i şer‘-i hatîr-i lâzımü’t-tevkīrde işbu hâmilü’l-kitâb Ahmed b. ( ) mahzarında bi’t-tav‘i’s-sâf ikrâr ve i‘tirâf edip mahalle-i mezbûrede vâki‘ bir tarafdan peremeci Ali mülkü ve bir tarafdan Ahmed mülkü ve bir tarafdan Davud Halîfe b. Mehmed mülkü ve bir tarafdan ba‘zan tarîk-i âm ve ba‘zan Meryem Hâtun mülkü ile mahdûd ve bir bâb tahtânî odayı ve eşcâr-ı müsmire ve gayr-ı müsmireyi ve kenîfi müştemil olup mülk-i mevhûbum olan menzili, cümle tevâbi‘ ve levâhıkı ile ve kâffe-i menâfi‘i ve merâfıkı ile mezbûr Ahmed[’e] fıddî nakd-i râyic fi’l-vakt üç bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve tesellüm ettikden sonra semen-i mezbûr üç bin akçeyi mezbûr Ahmed yedinden bi’t-tamâm ve’l-kemâl ahz ve kabz eyledim ba‘de’l-yevm zikr olunan menzil-i mezbûr Ahmed’in mülk-i müşterâsı olmuşdur. Keyfe mâ yeşâ’ ve yahtâr mutasarrıfe olsun dedikde mukırr-ı mezbûr Süleyman’ı ikrâr-ı meşrûhunda el-mukarru lehü’l-merkūm Ahmed vicâhen tasdîk ve şifâ[hen] tahkīk etmeğin mâ vaka‘a bi’t-taleb ketb olundu. Tahrîren fi’l-yevmi’s-sânî ve’l-ışrîn min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Fahrü’l-müderrisîn Ahmed Efendi, Hasan Efendi b. Ahmed, Davud Halîfe b. Mehmed, Ali b. Hüseyin, Abdurrahman Çelebi b. Habib el-Hammâmî, Mehmed b. Ali, Hasan b. Hüseyin, Ali b. Hüseyin, Ali b. Veli.