Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 415 Hüküm no: 544 Orijinal metin no: [86b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Aydın’ın borcuna Yusuf b. Sefer’in kefil olduğu Medîne-i hazret-i Ebî Eyyûb el-Ensârî -radiye anhu Rabbühü’l-Bârî-mahallâtından Kızıl mahallesinde sâkin fahrü’l-akrân Ali b. Aydın nâm kimesne mahfil-i kazâda bâ‘isü’l-kitâb Kalorite v. Kerem? nâm zimmî muvâcehesinde ikrâr ve i‘tirâf edip mezbûr Kalorite’den târih-i kitâbdan mukaddem iştirâ eylediğim otuz bin akçe kıymetli iki tahta? samur kürk bahâsından on bin beş yüz akçe deynim bâkī kalmışdı hâlâ dahi mezbûr Kalorite’den iştirâ eylediğim bir darçınî ferâce kaplı sansar paçası kürk bahâsından dokuz bin beş yüz akçe deynim olup cem‘an yirmi bin akçe mezbûr Kalorite’ye zimmetimde vâcibü’l-edâ ve lâzımü’l-kazâ deynim vardır dedikde gıbbe’t-tasdîki’ş-şer‘î meblağ-ı mezbûr yirmi bin akçeye işbu hâzır bi’l-meclis el-Hâc Yusuf b. Sefer nâm kimesne emr ve kabûlü hâviye kefâlet ile kefîl oldum dedikde mâ hüve’l-vâki‘ gıbbe’t-taleb ketb olundu. Tahrîren fî evâili Zilhicceti’ş-şerîfe li sene seb‘a ve erba‘în ve elf. Şuhûdü’l-hâl: Sefer Halîfe b. Veli, es-Seyyid Fazlullah b. es-Seyyid Mehmed, es-Seyyid Mustafa b. es-Seyyid Mehmed, Yakub b. Çelebi el-Muhzır.