Eyüb Mahkemesi (Havass-ı Refia) 37 Numaralı Sicil (H. 1047 / M. 1637 - 1638) cilt: 25, sayfa: 423 Hüküm no: 557 Orijinal metin no: [88b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yarmini v. Petro’nun Vartan v. Dolce’yi öldürdüğünü kabul ettiği Havâss-ı Aliyye kazâsı müzâfâtından Terkos nâhiyesine tâbi‘ Hacı Mihaliç nâm karye sahrâsında maktûlen hâlik olan Vartan v. Dolce nâm zimmînin verâseti li ebeveyn ammisi işbu hâzır bi’l-meclis Avram v. Pavli nâm zimmî ile vilâyet-i Rumeli’nde Prizren kazâsına tâbi‘ Zopatoflu? nâm karyede sâkine vâlidesi Marya nâm Nasrâniyeye münhasıra olduğu şer‘an müte‘ayyin oldukdan sonra merkūm Avram, Yarmini v. Petro nâm zimmîyi mahfil-i kazâya ihzâr ve mahzarında üzerine da‘vâ edip mezbûr Yarmini târih-i kitâbdan on beş gün mukaddem mûrisim mezbûr Vartan’ı ânifen zikr olunan Hacı Mihaliç karye sahrâsında soya ta‘bîr olunup bıçak ile sol böğründen urup katl eylemişdir suâl olunup takrîr tahrîr olunmak matlûbumdur dedikde gıbbe’s-suâl mezbûr Yarmini hâlik-i merkūm Vartan’ı mevzi‘-i mezbûrda vech-i meşrûh üzre soya ta‘bîr olunur bıçak ile urup katl eylediğini bi’t-tav‘i’s-sâf ikrâr ve i‘tirâf etmeğin mâ hüve’l-vâki‘ gıbbe’t-taleb ketb olundu. Fi’l-yevmi’l-hâmis ve’l-ışrîn min Zilka‘deti’ş-şerîfe li sene seb‘a ve erba‘în ve elf. Şuhûdü’l-hâl: Ahmed Bey b. Mehmed, Yakub b. Kurd, Ali b. Mustafa, Mustafa Çelebi b. Veli, Mehmed b. Veli, Yusuf, Mustafa b. Ahmed.