Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 561 Hüküm no: 688 Orijinal metin no: [87b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Receb Ağa’nın evini basıp annesi Raziye ile câriyesi Mâhitâbân’ı öldürüp evdeki eşyaları çalanların suçlarını ikrarı Ve zâlik ağa huzûrlarında akd-i meclis-i şer‘-i şerîf olundukda mahrûse-i Üsküdar’da Zincirlikuyu kurbunda sâkin Receb Ağa nâm kimesne meclis-i ma‘kūd-ı mezbûrda mahmiye-i İstanbul’da Topkapısı dâhilinde sâkin Mustafa b. Ahmed ve bekçi Veli b. Derviş ve Eğrikapı dâhilinde sâkin Şaban b. Mehmed nâm kimesneler mahzarlarında takrîr-i kelâm edip mezbûrûn Mustafa ve bekçi Veli ve Şaban bundan akdem gāibân ani’l-meclis Erzurumlu İvaz ve Mehmed nâm kimesneler ile gece ile evimi basıp vâlidem Râziye Hâtun’a ve câriyem Mâhitâbân’ı katl edip içinde mevcûd olan eşyâmdan üç küçük dârâyîye kaplı zerdava bogasi [ve] bir zenâne kürk ve bir çift zümrüd küpe ve bir beyaz sâde ve kırmızı kumaş kaftan ve iki mantârî ta‘bîr olunur işleme yastık ve ba‘zı eşyâmı ahz u kabz etmişlerdir suâl olunup takrîrleri tahrîr olunmak matlûbumdur dedikde gıbbe’s-suâl mezbûrûn Mustafa ve bekçi Veli ve Şaban cevâblarında hamamcı karısı ve mezbûr Şaban’ın zevcesi Hatice Hâtun kılavuzluk etmeleri ile vech-i muharrer üzre mezbûr Receb Ağa’nın evi yanına varıp mezbûr İvaz ve Mehmed evin içine girip mezbûretân Râziye ve Mâhitâbân’ı katl edip menzili içinden eşyâ-i mezbûreyi ve bunlardan mâ‘adâ ba‘zı eşyâsını ahz ve bize teslîm edip biz dahi alıp getirip beynimizde iktisâm ettiğimizde zikr olunan eşyâ bizim hissemiz için ta‘yîn olunmuşidi dediklerinde mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Es-Sâbikūn.