Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 561 Hüküm no: 689 Orijinal metin no: [87b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Veli b. Derviş ve Hüseyin b. Mustafa’nın, Pentarin v. Şamşon’un evini basıp eşyalarını çalanların suçlarını ikrarı Ve zâlik ağa huzûrlarında akd-i meclis-i şer‘-i şerîf olundukda mahrûse-i Galata müzâfâtından kasaba-i Beşiktaş’da Paşa mahallesi sükkânından olup Yahud tâifesinin Alaman cemâ‘atinden olan bâ‘isü’l-kitâb Pentarin v. Şamşon nâm Yahudi meclis-i ma‘kūd-ı mezbûrda mahmiye-i mezbûrda Topkapısı dâhilinde sâkin Mustafa b. Ahmed ve Lâleli çeşme kurbunda sâkin peremeci Hüseyin b. Derviş ve Eğrikapı dâhilinde sâkin diğer Mustafa b. Ali ve Şaban b. Mehmed ve bekçi Veli b. Derviş ve Hüseyin b. Mustafa nâm kimesneler mahzarında üzerlerine da‘vâ ve takrîr-i kelâm edip mezbûrûn Mustafa ve peremeci Hüseyin ve diğer Mustafa ve Şaban ve bekçi Veli ve diğer Hüseyin bundan akdem gāibûn ani’l-meclis eşkiyâdan birkaç kimesneler ile cem‘ olunup gece ile mahalle-i mezbûrda vâki‘ menzilimi basıp menzilim içine girip muharrer olan mahalde olan eşyâmdan işbu meclisde mevcûd mecmû‘u yirmi beş bin akçe kıymetli üç serâser mak‘ad ve biri al ve biri yeşil çukaya kaplı iki samur paçalı zenâne kürk ve mâî sandala kaplı arkası kuzu önleri sansar paçalı bir kürk ve beyaz sâde zıbın ve bir işleme bohça ve bir beylik çuka yağmurluk ve bir yemeni bohça ve dört münakkaş makrama ve bir işleme uçkur ve kılâbdan ile sandal kumaş üzerine işlemeli bir yorgan yüzü ve ba‘zı eşyâmı ahz ve mahall-i muhrezinden ihrâc edip beynlerinde taksîm ettiklerinde eşyâ-i mezbûre-i mevcûde[den] merkūmûn Mustafa ve peremeci Hüseyin ve diğer Mustafa ve bekçi Veli ve Şaban ve diğer Hüseyin’in hisseleri için ta‘yîn olunup her birinin vech-i muharrer üzre makbûzlarının kıymetini nisâb-ı serîkaya bâliğ olmağla suâl olunup mûcebi icrâ olunmak matlûbumdur dedikde gıbbe’s-suâl mezbûrûn Mustafa ve peremeci Hüseyin ve diğer Mustafa ve bekçi Veli ve Şaban ve diğer Hüseyin’den her biri eşkiyâdan gāibûn ani’l-meclis birkaç kimesneler ile müdde‘î-i mezbûrun vech-i mübeyyen üzerine menzilini basıp mahall-i muhrezinden ahz ve ihrâc ettikleri eşyâsını beynlerinde tevzî‘ ettiklerinde zikr olunan eşyâ-i mevcûde kendi hisselerine düşüp vech-i muharrer üzre her birinin makbûzu nisâb-ı serîkaya bâliğ olduğunu her biri ikrâr etmeğin mûcebince ba‘de’l-hükm mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Es-Sâbikūn.