Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 562 Hüküm no: 690 Orijinal metin no: [87b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Beşe b. Mehmed’in evini basıp eşyalarını çalanların suçlarını ikrarı Ve zâlik ağa ile zeyl-i vesîkada muharrerü’l-esâmî olan müslimîn huzûrlarında akd-i meclis-i şer‘-i şerîf olundukda mahrûse-i Üsküdar’da Doğancılar nâm mevzi‘ kurbunda sâkin Oturak Ahmed Beşe b. Mehmed nâm kimesne meclis-i ma‘kūd-ı mezbûrda mahmiye-i mezbûrda Topkapısı dâhilinde sâkin Mustafa Bey b. Ahmed ve Lâleli çeşme kurbunda sâkin peremeci Hüseyin b. Derviş ve Eğrikapı dâhilinde sâkin Kürd Yusuf b. Ali ve karındaşı diğer Mustafa ve Bodur Şaban b. Mehmed ve bekçi Veli nâm kimesneler mahzarlarında takrîr-i kelâm edip mezbûrûn Mustafa Bey ve peremeci Hüseyin ve Kürd Yusuf ve karındaşı diğer Mustafa ve Bodur Şaban ve bekçi Veli bundan akdem gece ile mevzi‘-i mezbûr kurbunda sâkin olduğum menzilimi basıp içinde olan eşyâmdan işbu meclis-i mevcûd nısf vakıyye beyaz penbe ipliğimi ve bir havlu sileceğimi ve bir kadife yeşil terpûşumu ve nâ-mevcûd savadlı bir sîm topuzumu ve bir Haydârî rahtımı ve bir sîm kemer kuşağımı ve ba‘zı eşyâmı ahz u kabz etmişlerdir suâl olunup takrîrleri tahrîr olunmak matlûbumdur dedikde gıbbe’s-suâl mezbûrûn Mustafa Bey ve peremeci Hüseyin ve Kürd Yusuf ve karındaşı diğer Mustafa ve bekçi Veli ve Bodur Şaban müdde‘î-i mezbûrun vech-i mübeyyen üzre menzilini basıp eşyâ-i mezbûresini ahz u kabz ettiklerini her biri ikrâr etmeğin mâ vaka‘a bi’t-taleb ketb olundu. Fi’r-râbi‘ ve’l-ışrîn min Şa‘bân sene 1077. Şuhûdü’l-hâl: Es-Sâbikūn.