Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 563 Hüküm no: 692 Orijinal metin no: [88a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Havva Hatun bt. Abdülaziz Efendi’nin câriyesi Dilâver bt. Abdullah’ı âzat ettiği Husûs-ı âti’l-beyânın mahallinde tahrîri iltimâs olunmağın savb-ı şer‘-i hatîr-i lâzımü’t-tevkīrden mevlânâ Ahmed Efendi b. Mehmed irsâl olunup ol dahi mahmiye-i İstanbul’da Manisalı Çelebi mahallesinde Abdüllatîf Çelebi b. Mehmed Efendi’nin sâkin olduğu menziline varıp zeyl-i rakīmde isimleri terkīm olunan udûl-i müslimîn mahzarlarında akd-i meclis-i şer‘-i mübîn eyledikde mahalle-i mezbûre sâkinelerinden umdetü’l-muhadderât zübdetü’l-muvakkarât Havva Hâtun bt. el-merhûm ed-dâricü ilâ medârici rahmeti Rabbihi’l-kayyûm Abdülaziz Efendi zâtı ma‘rifet-i şer‘iyye ile ârifân mûmâ-ileyh Abdüllatîf Çelebi ile el-Hâc Receb b. Abdullah nâm kimesne ta‘rîfleriyle mu‘arrefe oldukdan sonra meclis-i ma‘kūd-ı mezbûrda tav‘an ve rağbeten ikrâr ve takrîr-i kelâm edip bana rıkkıyyetini mu‘terife olan açık kaşlı, gök elâ gözlü, uzun boylu Rûsiyyetü’l-asl bâ‘isetü’l-kitâb Dilâver bt. Abdullah nâm câriye-i memlûkemi hasbeten lillâhi te‘âlâ ve taleben li merzâti’r-Rabbi’l-a‘lâ tahrîr ve i‘tâk [ve] zümre-i harâir-i asliyyâta ilhâk eyledim ba‘de’l-yevm mevsûfe-i mezbûre sâir harâir-i asliyyât gibi hürre olup üzerinde hakk-ı velâ-i şer‘îden gayrı hak ve alâkam kalmadı dedikde husûs-ı mezbûru mevlânâ-yı mezbûr mahallinde tahrîr ba‘dehû ma‘an irsâl olunan Yusuf b. Mehmed ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâbi‘ aşer min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Umdetü’l-emâsil ve’l-a‘yân Abdüllatîf Efendi b. Mehmed Efendi, Ahmed Efendi b. Mustafa Efendi Tâbi‘-i Dâmâd Efendi, Abdullah Çelebi b. İbrahim, el-Hâc Süleyman b. ( ).