Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 564 Hüküm no: 693 Orijinal metin no: [88a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmühani Hatun bt. Ali Efendi’nin câriyesi Gülistan’ı âzat ettiği Husûs-ı âti’l-beyânın mahallinde tahrîri iltimâs olunmağın savb-ı şer‘-i hatîr-i lâzımü’t-tevkīrde mevlânâ Ahmed Efendi b. Mehmed irsâl olunup ol dahi mahmiye-i İstanbul’da Manisalı Çelebi mahallesinde umdetü’l-emâsil ve’l-a‘yân Abdüllatîf Çelebi b. Mehmed Efendi’nin sâkin olduğu menziline varıp zeyl-i rakīmde isimleri terkīm olunan udûl-i müslimîn mahzarlarında akd-i meclis-i şer‘-i mübîn eyledikde mahmiye-i mezbûre mahallâtından Kabakulak çeşmesi kurbunda Muhtesib İskender mahallesi sâkinelerinden olup esâret-i ma‘hûdesi nutku makāmına kāim olan fahrü’l-muhadderât Ümmühâni Hâtun bt. Ali Efendi nâm harsa zâtı ma‘rifet-i şer‘iyye ile ârifân mûmâ-ileyh Abdüllatîf Çelebi ile el-Hâc Receb b. Abdullah nâm kimesne ta‘rîfleriyle mu‘arrefe oldukdan sonra meclis-i ma‘kūd-ı mezbûrda tav‘an ve rağbeten ikrâr ve takrîr-i kelâm edip bana rıkkıyyetini mu‘terife olan açık kaşlı, elâ gözlü, orta boylu Rûsiyyetü’l-asl Gülistan bt. Abdullah nâm câriye-i memlûkemi hasbeten lillâhi’l-ahad ve taleben li merzâti’r-Rabbi’s-samed tahrîr ve i‘tâk ve zümre-i harâir-i asliyyâta ilhâk eyledim ba‘de’l-yevm mevsûfe-i mezbûre Gülistan sâir harâir-i asliyyât gibi hürre olup üzerinde hakk-ı velâ-i şer‘den gayrı hak ve alâkam kalmadı dedikde husûs-ı mezbûru mevlânâ-yı merkūm mahallinde terkīm ba‘dehû ma‘an irsâl olunan Yusuf b. Mehmed ile meclis-i şer‘-i hatîre gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb olundu. Fi’l-yevmi’s-sâbi‘ aşer min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Es-Sâbikūn.