Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 567 Hüküm no: 696 Orijinal metin no: [88b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Musli Efendi b. Halil’in Osman Çelebi b. Mehmed’deki alacağını vârisi Ramazan’ın tahsil ettiği Fi’l-asl vilâyet-i Anadolu’da Bolu sancağında Yenice kazâsına tâbi‘ Çelikköyü nâm karye ahâlîsinden olup bundan akdem mahmiye-i İstanbul’da Ahîzâde mahallesinde sâkin iken vefât eden Musli Efendi b. Halil’in li ebeveyn karındaşı müteveffâ Kemal’in oğlu ve hasren vârisi olan Ramazan nâm kimesne meclis-i şer‘-i şerîf-i lâzımü’t-teşrîfde mahalle-i mezbûr sükkânından bâ‘isü’l-kitâb Osman Çelebi b. Mehmed nâm kimesne mahzarında ikrâr ve takrîr-i kelâm edip mûrisim mezbûr Musli Efendi merhûm Osman Çelebi’nin menzilinde vefât etmekle terekesinden mezbûr Osman Çelebi’nin bi tarîki’l-emâne makbûzu olan bir benefşe sof ferâce ve bir yeşil çukaya kaplı abdest kürkü ve bir bogasi kaftan ve bir neftî bogasi sâde ve iki beyaz bogasi sâde ve bir beyaz bogasi entari ve iki kebesi ve bir beyaz velense ve iki yemeni yorgan ve bir tülbent bürüğü ve bir çizmeyi mezbûr Osman Çelebi yedinden tamâmen ahz u kabz ettikden sonra tereke-i müteveffâ-yı mezbûra müte‘allika âmme-i de‘âvîden ben mezbûr Osman Çelebi’nin zimmetini ve mezbûr Osman Çelebi dahi mukaddemâ bana iki def‘a da ikrâz ve teslîm ben dahi iktirâz ve kabz eylediğim iki bin altı yüz akçeye ve bana hibe ve teslîm ben dahi ittihâb ve kabz ve tesellüm ettiğim bir don ve bir gömleğe müte‘allika âmme-i de‘âvîden benim zimmetimi ibrâ-i âmm-ı kātı‘ü’n-nizâ‘ ile ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi selhi Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Umdetü’l-a‘yân Abdülhalim Efendi b. Ahmed, Nuh Efendi b. Kemaleddin, Musa Halîfe b. ( ) el-Müezzin, vezneci Mehmed Çelebi, Mehmed Çelebi b. Mehmed, Yusuf Bey b. Abdülmennân.