Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 569 Hüküm no: 699 Orijinal metin no: [89a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Mahmud Beşe b. Hüseyin Beşe’nin Mustafa Çelebi b. el-Hâc Rıdvan’daki emanetlerini vârislerin teslim aldığı Mahmiye-i İstanbul’da Hacı Muhyiddin mahallesi ahâlîsinden olup bundan akdem sefer-i hümâyûndan gelirken esnâ-i tarîkde Siroz kasabasında vefât eden Altıncı Ağa Bölüğü yoldaşlarından Mahmud Beşe b. Hüseyin Beşe’nin hasren vârisi olan vâlidesi Küşâde bt. Abdullah ile li ebeveyn er karındaşı İbrahim nâm kimesne meclis-i şer‘-i şerîf-i şâmihü’l-imâdda ve mahfil-i dîn-i münîf-i râsihü’l-evtâdda bâ‘isü’l-kitâb Mustafa Çelebi b. el-Hâc Rıdvan nâm kimesne mahzarında her biri ikrâr ve takrîr-i kelâm edip müteveffâ-yı mezbûrun hayâtında bize def‘ [ve] teslîm için kendi malından mezbûr Mustafa Çelebi’ye emânet verdiği elli bir frengî ve on üç şerîfî altını ve elli üç buçuk guruşu reşîd karındaşı Hacı Mustafa Beşe’nin iki kıst ulûfesinden aldığı ve bir çıkın içinde olan ma‘lûmü’l-mikdâr akçeyi mezbûr Mustafa Çelebi bize teslîm biz dahi tamâmen yedinden ahz u kabz eyledik min ba‘d meblağ-ı mezbûrdan yedinde bir akçe ve bir habbe bâkī kalmayıp mezbûr Mustafa Çelebi ile tereke-i müteveffâ-yı mezbûra müte‘allika da‘vâm yokdur dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî selhi Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Es-Seyyid Abdülkādir b. ( ), Osman Bey b. Receb, Derviş Bey b. Rıdvan, Derviş Mehmed b. Mustafa.