Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 569 Hüküm no: 700 Orijinal metin no: [89a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Yusuf’un, kendisini dövüp çocuğunu düşürmesine sebep olduğunu iddia ettiği ev sahibi hakkındaki iddiasını ispat edemediği Mahrûse-i Galata hâricinde Bedreddin mahallesinde sâkine Âişe bt. Yusuf nâm hâtun meclis-i şer‘-i hatîr-i lâzımü’t-tevkīrde bâ‘isü’l-kitâb İmâm Es-Seyyid Abdülganî Efendi b. Hasan mahzarında üzerine da‘vâ ve takrîr-i kelâm edip ben mezbûr Es-Seyyid Abdülganî Efendi’nin gallesi kendiye meşrût menzilinde müste’ciri olup târih-i kitâbdan beş gün mukaddem kendiye deynim olan yüz kırk beş akçe menzil ücretini kendi sâkin olduğu menziline teslîm etmek için vardığımda mezbûr es-Seyyid Abdülganî Efendi beni bi gayrı hakkın şer‘î sırık ve depme ile darb edip mezbûrun darbından nâşî müstebînü’l-hilka bir cenîn ilkā etmiş[im]dir suâl olunup ihkāk-ı hak olunmak matlûbumdur dedikde gıbbe’s-suâl ve’l-inkâr müdde‘iyye-i mezbûreden müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin mezbûr Es-Seyyid Abdülganî Efendi’ye vech-i şer‘î üzre yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin mûcebince mezbûre Âişe’ye bilâ-beyyine bî-vech mu‘ârazadan men‘ olunup mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Es-Seyyid Hasan Çavuş el-Mübâşir, Mustafa b. Mehmed, Mehmed b. Ömer, Es-Seyyid Ali b. Osman, Ali Efendi [b.] Musa, Veli b. Ahmed, Süleyman b. Ali.