Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 570 Hüküm no: 701 Orijinal metin no: [89a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dilâver Bey b. Abdullah’ın, Ahmed Ağa b. Abdullah’ın timarı reâyâsından olmadığı, raiyyet rüsûmu için taciz edilmemesi Vilâyet-i Anadolu’da Geyve Akhisarı kazâsına tâbi‘ Hisarlık nâm karye ahâlîsinden Hacı Receb b. Ali b. Hüseyin ve Oruc b. Mustafa b. Ramazan nâm kimesneler meclis-i şer‘-i şerîf-i Ahmedî ve mahfil-i dîn-i münîf-i Ahmedî’de vilâyet-i mezbûrda Bozöyük kazâsına tâbi‘ Yenice nâm karye ve gayrıdan altı bin akçe timara mutasarrıf olan Dilâver Bey b. Abdullah nâm kimesne mahzarında her biri takrîr-i kelâm edip bizim cedlerimiz mezbûrân Hüseyin ve Ramazan ile gāib ani’l-meclis Ali b. ( ) nâm kimesnenin ceddi hâzır bi’l-meclis Ahmed Ağa b. Abdullah’ın vilâyet-i mezbûrda Sultanönü sancağında mutasarrıf olduğu ( ) nâm timarın defterlü re‘âyâsından olup biz dahi mezbûr Ahmed Ağa’nın mutasarrıf olduğu timar-ı mezbûrun re‘âyâsından olmağla on beş seneden beri rüsûm-ı ra‘iyyetimizi mezbûr Ahmed Ağa’nın mutasarrıf olduğu timara mutasarrıf olanlara veregelip mezbûr Dilâver Bey’in timarı re‘âyâsından değil iken mezbûr Dilâver Bey benim timarım re‘âyâsındansız deyû bi gayrı hakkın rüsûm-ı ra‘iyyet talebi ile bizi rencîde eder suâl olunup men‘ olunmak matlûbumdur dediklerinde gıbbe’s-suâl mezbûr Dilâver Bey cevâbında ba‘zı kimesneler için senin timarın re‘âyâsındandır deyû bana haber vermeleri ile mezbûrlardan rüsûm-ı ra‘iyyetlerini taleb etmişidim deyip timarı re‘âyâsından olduğu vech-i şer‘î üzre beyâna kādir olmamağın mûcebince mezbûr Dilâver Bey’e vech-i muharrer üzre mezbûrları rencîde etmemek üzre ba‘de’t-tenbîh mâ vaka‘a bi’t-taleb ketb olundu. Fî selhi Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, İbrahim Çelebi b. Ahmed, Hasan b. Ahmed, Baba Resul b. ( ) Du‘âcı, Mehmed Çelebi b. Ramazan.