Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 571 Hüküm no: 702 Orijinal metin no: [89a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Muzaffer’in, câriyesi Gülistan bt. Abdullah’ı âzat ettiği Mahmiye-i İstanbul’da Küçük Ayasofya mahallesinde sâkine Âişe bt. Muzaffer nâm hâtun tarafından husûs-ı âtîye vekîl olduğu mezkûrenin zâtını ma‘rifet-i şer‘iyye ile ârifân olup mahalle-i mezkûre sükkânından olan Mehmed Beşe b. Abdullah ve Mehmed Çelebi b. Abdülkerim nâm kimesne[ler] şehâdetleri ile şer‘an [vekâleti] sâbit olan Veli Bey b. Mahmud nâm kimesne meclis-i şer‘-i şerîf-i lâzımü’t-teşrîfde bi’l-vekâle ikrâr ve takrîr-i kelâm edip müvekkilem mezbûre Âişe Hâtun kendiye rıkkıyyetini mu‘terife olan işbu orta boylu, açık kaşlı, gök elâ gözlü Boğdaniyyetü’l-asl bâ‘isetü’l-vesîka Gülistan bt. Abdullah nâm câriye-i memlûkesini târih-i kitâbdan altı sene mukaddem tahrîr ve i‘tâk ve zümre-i harâir-i asliyyâta idrâc ve ilhâk etmişidi ol târihden beri mevsûfe-i mezkûre Gülistan sâir harâir-i asliyyât gibi hürre olup üzerine velâ-i şer‘îden gayrı hakkı kalmamışdır dedikde mâ hüve’l-vâki‘ bi’t-taleb ketb olundu. Fi’l-yevmi’s-sânî min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Efendi [b.] el-Müezzin, Hacı Hüseyin b. Numan, Mustafa b. Muharrem, Mehmed b. Abdullah.