Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 575 Hüküm no: 708 Orijinal metin no: [90a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. İbrahim’in, eş-Şeyh Ahmed Efendi’ye evini bey‘ bi’listiğlâl yoluyla sattığı Husûs-ı âti’l-beyânın mahallinde tahrîri iltimâs olunmağın kıbel-i şer‘-i enverden irsâl olunan mevlânâ Mehmed Efendi b. Abdülbâkī mahmiye-i İstanbul’da Saray-ı cedîd-i sultânî’de Bâb-ı Hümâyûn kurbunda arz ağalarına mahsûs odaya varıp zeyl-i rakīmde mastûrü’l-esâmî olan müslimîn huzûrunda akd-i meclis-i şer‘-i hatîr eyledikde mahmiye-i mezkûrda Zeyrek mahallesinde sâkin Mühürdâr demekle ma‘rûf Mehmed Ağa b. İbrahim meclis-i ma‘kūd-ı mezbûrda umdetü’l-vâ‘izîn zübdetü’l-münâsihîn eş-Şeyh Ahmed Efendi b. el-merhûm eş-Şeyh İsmail Efendi mahzarında ikrâr ve takrîr-i kelâm edip Havâss-ı Refî‘a mahallâtından Defterdâr câmi‘i kurbunda Çömlekçiler mahallesinde vâki‘ bir tarafdan Ayasofya vakfı ve üç tarafdan tarîk-i âm ile mahdûd dâhilen ve hâricen büyût-ı adîde ve cüneyneyi müştemil mülk menzili cümle hukūk ve merâfıkı ile mûmâ-ileyh eş-Şeyh Ahmed Efendi’[ye] yedi yüz esedî guruşa bi tarîki’l-istiğlâl bey‘ ve teslîm edip ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûru mûmâ-ileyh eş-Şeyh Ahmed Efendi yedinden tamâmen ahz u kabz edip yine menzil-i mahdûd-ı mezkûru mûmâ-ileyh Şeyh Ahmed Efendi ba‘de’t-tahliyyeti’ş-şer‘iyye târih-i kitâbdan üç yüz altmış gün tamâmına değin yüz beş esedî guruşa bana îcâr ve teslîm edip ben dahi vech-i muharrer üzre istîcâr ve tesellüm ve kabûl eyledim dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olan Mustafa b. ( ) ve Hüseyin b. Receb ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Umdetü’l-havâs ve’l-mukarrebîn Ahmed Ağa-yı Saray-ı cedîd-i sultânî, umdetü’l-emâcid ve’l-ekârim Ali Ağa Kethüdâ, Mehmed Çavuş b. İbrahim, Hacı Receb b. Fazlullah, Osman Bey b. Bekir.