Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 576 Hüküm no: 710 Orijinal metin no: [90a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bostancıbaşı el-Hâc Mustafa Ağa’nın yakalayıp mahkemeye getirdiği iki şahsın hırsızlıkta ortak hareket ettikleri Husûs-ı âti’l-beyânın mahallinde tahrîri iltimâs olunmağla mahmiye-i İstanbul’da Saray-ı cedîd-i sultânî’de vâki‘ bostancılar odası demekle ma‘rûf odaya varılıp zeyl-i kitâbda muharrerü’l-esâmî olan müslimîn huzûrunda akd-i meclis-i şer‘-i şerîf olundukda hâlâ bostancıbaşı olup sürrâk ve kuttâ‘-ı tarîk ahzına memûr olan iftihârü’l-emâcid ve’l-ekârim câmi‘ü’l-mehâmid ve’l-mekârim el-Hâc Mustafa Ağa meclis-i ma‘kūd-ı mezbûrda mahmiye-i mezbûrda Petrokapısı hâricinde sâkin Eflak İstefan v. Zefye ve kasaba-i Kasımpaşa’da Zincirlikuyu mahallesinde sâkin Kostantin v. ( ) nâm zimmîler mahzarlarında takrîr-i kelâm ve ta‘bîr ani’l-merâm edip mezbûrân İstefan ve Kostantin hırsızlar ile şerîk ve yataklarından olup hattâ târih-i kitâbdan otuz gün mukaddem Kurd Voyvoda ve Balaban nâm hırsızlar merkūm İstefan’ın evinde iken mezbûrân ahz için âdem gönderdiğimde bir bostancıyı âlet-i harb ile cerh edip ve Eyyûb-i Ensârî iskelesi kurbunda Arslan iskelesinde sâdâtdan bir âdemi katl etmişlerdir ve hırsızlardan olup vilâyet-i Rumeli’nde kasaba-i Balçık’da olan Todori ve Vasil nâm zimmîler Balçık iskelesinden yarın varıp sizin ile cem‘ olup nice şikârlar ederiz deyû mezbûr Kostantin’e mektûb göndermişdir, suâl olunup takrîrleri tahrîr olunmak murâdımdır dedikde evvelen mezbûr İstefan’a suâl olundukda cevâbında merkūm Kurd mukaddemâ benim ile balıkçı olup akrabam olmağla gâhîce menzilime gelirdi ol gece mezbûr Balaban ile ma‘an gelmişdir deyû ikrâr ve sâniyen Kostantin’e suâl olundukda cevâbında mezbûrân Todori ve Vasil kasaba-i mezbûreden bana mektûb göndermişler idi okumadan ateşe urup yakdım ne yazıldığını bilmem demeğin hıfzen li’l-makāl mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Umdetü’l-meşâyih Abdülvehhâb Efendi b. Abdurrahman, Ali Efendi b. Abdülhalim, Ömer Efendi b. Mehmed, Ahmed b. Mustafa, Mustafa b. Süleyman.