Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 577 Hüküm no: 711 Orijinal metin no: [90a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kadı Abdürrahim Efendi’nin Abdülkādir Ağa b. Kasım’a eşya bedelinden borçlu olduğu Mahmiye-i İstanbul’da Ali Paşa câmi‘-i şerîfi kurbunda sâkin bâ‘isü’l-kitâb Abdülkādir Ağa b. Kasım nâm kimesne meclis-i şer‘-i şerîfde kuzât-ı Mısriyye’den Abdürrahim Efendi b. Mehmed nâm kimesne mahzarında üzerine da‘vâ ve takrîr-i kelâm edip mezbûr Abdürrahim Efendi zimmetinde yedimden müşterâ ve makbûz beynimizde ma‘lûm hilâlî ta‘bîr olunur doksan donluk Şam alacası ve bir gaddâre semenlerinden dört yüz esedî guruş hakkım vardır suâl olunup alıverilmek matlûbumdur dedikde, gıbbe’s-suâl mezbûr Abdürrahim Efendi müdde‘î-i mezbûra yedinden müşterâ ve makbûz beynlerinde ma‘lûm hilâlî ta‘bîr olunur altı yüz doksan donluk Şam alacası ve bir gaddâre semenlerinden zimmetinde vâcibü’l-edâ ve lâzımü’l-kazâ yüz esedî guruşu olduğunu tâyi‘an ikrâr etmeğin mûcebince semen-i mezbûr dört yüz guruş müdde‘î-i mezbûra edâya merkūm Abdürrahim Efendi’ye tenbîh olunmağın mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min Ramazâni’l-mübârek li sene seb‘a ve seb‘în ve elf. Şuhûdü’l-hâl: Fahrü’l-akrân Yusuf Çavuş el-Mübâşir, fahrü’l-emâsil Mehmed Çelebi b. ( ) Kethüdâ-yı muhzırân, fahrü’l-eşbâh Eyüb Ağa b. ( ) Kethüdâ-yı hazret-i efendi, İbrahim Çelebi b. Ahmed.