Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 578 Hüküm no: 712 Orijinal metin no: [90a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Foti v. Polihroni’nin, el-Hâc Mehmed b. Receb’e Trabzon ipliği bahasından olan borcunun Hacı Mehmed’e havale edildiği Mahmiye-i İstanbul’da Dîvâne Ali mahallesinde sâkin el-Hâc Mehmed b. Receb nâm kimesne meclis-i şer‘-i hatîrde Foti v. Polihroni nâm zimmî muvâcehesinde üzerine da‘vâ ve takrîr-i kelâm edip işbu hâzır bi’l-meclis İbrahim Beşe b. Hasan nâm kimesnenin mezbûr Foti zimmetinde yedinden müşterâ ve makbûz beş yüz altı top Trabzon ipliği semeninden dört yüz yirmi iki buçuk esedî guruş hakkı olmağın mezbûr İbrahim Beşe meblağ-ı mezbûru mezbûr Foti’den târih-i kitâbdan on beş gün mukaddem taleb ve da‘vâ eyledikde ol dahi meblağ-ı mezbûrun doksan üç guruşundan mâ‘adâsını edâ ve teslîm etmişdim demekle beynlerinde münâza‘ât-ı kesîre vukū‘undan sonra muslihûn tavassut edip mezbûr İbrahim Beşe ile meblağ-ı mezbûr da‘vâsından beynlerinde iki yüz esedî guruş üzerine sulh ettiklerinde mezbûr İbrahim Beşe sulh-i mezbûru kabûl ve bedel-i sulh olan meblağ-ı mezbûru almağa mezbûr İbrahim Beşe merkūm Foti üzerine beni havâle etmişidi, hâlâ meblağ-ı mezbûr iki yüz esedî guruş bedel-i sulhü mezbûr Foti’den taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup mahmiye-i mezkûrda [90b] Kaliçeci Hasan mahallesi ahâlîsinden el-Hâc Şaban b. Resul ve Hasan Çelebi b. Abdullah ve Hacı Mehmed b. Ahmed ve Veli b. Mehmed nâm kimesne li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka târih-i kitâbdan on beş gün mukaddem mezbûr İbrahim Beşe mezbûr Foti zimmîden vech-i meşrûh üzre beş yüz altı top iplik semeninden dört yüz yirmi iki buçuk esedî guruşu da‘vâ eyledikde ol dahi doksan üç guruşundan mâ‘adâsını edâ etmişidim demekle beynlerinde münâza‘ât-ı kesîre vukū‘undan sonra muslihûn tavassut edip mezbûr İbrahim Beşe ile beynlerinde iki yüz esedî guruş üzerine sulh ettiklerinde mezbûr İbrahim Beşe sulh-i mezbûru kabûl ve bedel-i sulh olan meblağ-ı mezbûru almağa mezbûr İbrahim Beşe merkūm Foti üzerine müdde‘î-i merkūm Hacı Mehmed’i havâle edip ol dahi kabûl etmişidi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde gıbbe ri‘âyeti şerâiti’l-kabûl şehâdetleri makbûle olmağın mûcebince meblağ-ı mezbûr iki yüz esedî guruş bedel-i sulhü müdde‘î-i mezbûr Hacı Mehmed’e edâ ve teslîme merkūm Foti’ye tenbîh olunmağın mâ vaka‘a bi’t-taleb ketb olundu. Fi’l-yevmi’l-hâmis min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Çavuş b. Yusuf el-Mübâşir, İbrahim Çelebi b. Ahmed, Hasan Çelebi b. Mehmed, Ahmed Çelebi b. ( ).