Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 579 Hüküm no: 713 Orijinal metin no: [90b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Salamon v. Bonco’nun, Semhole bt. İsak’tan altın yüzük bahasından alacaklı olduğu Tâife-i Yahûd’un Ohri cemâ‘atinden bâ‘isü’s-sifr Salamon v. Bonco nâm Yahudi meclis-i şer‘-i şerîfde Semhole bt. İsak nâm Yahudiye mahzarında üzerine da‘vâ ve takrîr-i kelâm edip bundan akdem lal taşlı bir altın yüzüğümü mezbûre Semhole’ye nakid yüz esedî guruşa bey‘ ve teslîm edip ol dahi iştirâ ve tesellüm etmişidi suâl olunup şer‘an lâzım gelen hakkımın alıverilmesi matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsın mübeyyine beyyine taleb olundukda mahrûse-i Galata’da Sakaldöken mahallesi sükkânından olup Kalavrita cemâ‘atinden olan Şemon v. Menahem ve mahrûse-i mezbûre müzâfâtından kasaba-i Beşiktaş’da sâkin Kirüz cemâ‘atinden Kemel v. Barim nâm Yahudiler li ecli’ş-şehâde meclis-i şer‘a hâzırân olup istişhâd olundukların fi’l-hakīka müdde‘î-i mezbûr lal taşlı bir altın yüzüğün mukaddemâ mezbûre Semhole’ye yüz esedî guruşa huzûrumuzda bey‘ ve teslîm edip mezbûre Semhole dahi iştirâ ve tesellüm etmişdir biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın zikr olunan yüzüğün altını ne mikdâr idiği nâ-ma‘lûm olmağla altın ve taşından bey‘ sahîh olmamağla mûcebince mevcûd ise aynını müdde‘î-i mezbûra teslîme müstehlek ise altının mislini ve taşının kıymetini ba‘de’l-beyân müdde‘î-i mezbûra zâmine olmak üzre mezbûre Semhole’ye tenbîh olmağın mâ vaka‘a bi’t-taleb ketb olundu. Fi’l-yevmi’l-hâdî min Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, Hasan Çelebi b. Ahmed, İbrahim Çelebi b. Ahmed, Baba Resul [b.] Rıdvan.