Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 579 Hüküm no: 714 Orijinal metin no: [90b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gülistan bt. Abdullah’ın, Mehmed Ağa b. Hüseyin Ağa tarafından bir sene önce âzat edildiği İşbu orta boylu, açık kaşlı, elâ gözlü Rûsiyyetü’l-asl rıkk-ı sâbıkını mu‘terife bâ‘isetü’l-kitâb Gülistan bt. Abdullah meclis-i şer‘-i şerîf-i Ahmedî ve mahfil-i dîn-i münîf-i Muhammedî’de rakīk olmak üzre kendiye vaz‘-ı yed eden Mehmed Ağa b. Hüseyin Ağa nâm kimesne mahzarında üzerine da‘vâ ve takrîr-i kelâm edip mezbûr Mehmed Ağa târih-i kitâbdan bir sene mukaddem sünnet olduğunda câriye-i memlûkesi olduğum hâlde malından beni tahrîr ve i‘tâk ve zümre-i harâir-i asliyyâta idrâc ve ilhâk edip hürre olmuş iken mezbûr Mehmed Ağa bi gayrı hakkın bana vaz‘-ı yed eder suâl olunup üzerimden yed-i mubtılası kasr ve izâle olunup sebîlim tahliyye olunmak matlûbumdur dedikde, gıbbe’s-suâl mezbûr Mehmed Ağa mevsûfe-i mezbûreyi i‘tâkını inkâr etmeğin mevsûfe-i mezbûreden müdde‘âsını mübeyyine beyyine taleb olundukda mahmiye-i İstanbul’da Molla Hüsrev mahallesi ahâlîsinden İsmail Ağa b. Osman ve Cafer Bey b. Abdullah ve İmâmzâde Mehmed Çelebi b. Mustafa nâm kimesneler li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka mezbûr Mehmed Ağa târih-i kitâbdan bir sene mukaddem sünnet olduğunda mevsûfe-i mezbûre câriye-i memlûkesi olduğu hâlde bizim huzûrumuzda malından i‘tâk ve zümre-i harâir-i asliyyâta idrâc ve ilhâk etmişidi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince mevsûfe-i mezbûrenin vech-i mübeyyen üzre hürriyetine hükm ve sebîli tahliyye olunup üzerinden yed-i mubtılasının kasr ve izâlesine mezbûr Mehmed Ağa’ya tenbîh olunmağın mâ vaka‘a bi’t-taleb ketb olundu. Fi’l-yevmi’r-râbi‘ min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Arslan Çavuş b. Mehmed el-Mübâşir, İbrahim Çelebi b. Ahmed, Yakub b. Hasan, çukadâr Hasan Beşe b. Abdullah.