Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 580 Hüküm no: 716 Orijinal metin no: [90b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Hasan’ın hür olduğu ve kimsenin câriyesi olmadığı Medîne-i Üsküdar’da Solak Sinan mahallesinde sâkin iken bundan akdem vefât eden Abdullah b. Abdullah’ın kızı ve hasren vârisi olan Âişe nâm hâtun meclis-i şer‘-i şerîfde bâ‘isetü’l-kitâb diğer Âişe bt. Hasan nâm hâtun mahzarında üzerine da‘vâ ve takrîr-i kelâm edip mezbûre diğer Âişe müteveffâ-yı mezbûrun câriye-i memlûkesi olmağla irsen bana intikāl etmişken rıkka inkıyâddan imtinâ‘ eder suâl olunup ihkāk-ı hak olunmak matlûbumdur dedikde gıbbe’s-suâl mezbûre diğer Âişe cevâbında müteveffâ-yı mezbûrun abd-i atîki olan Hasan’ın zevce-i menkûhası olup hürre olan Fâtıma Hâtun’dan ben mütevellide kızı olup hürretü’l-aslım deyû def‘le mukābele edicek gıbbe’l-istintâk ve’l-inkâr mezbûre diğer Âişe’den beyyine taleb olundukda mahalle-i mezbûr sükkânından Hasan Çavuş b. Mehmed ve Abdüllatîf Beşe b. Mehmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mevsûfe-i mezbûre diğer Âişe müdde‘iyye-i mezbûre Âişe’nin babası müteveffâ-yı mezbûr Abdullah’ın mu‘takı olan mezbûr Hasan’ın hürretü’l-asl olan zevcesi mezbûre Fâtıma’dan mütevellide sulbiye kızı olup firâş-ı hürriyetden mütevellid hürredir biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebince müdde‘iyye-i mezbûre Âişe vech-i muharrer üzre mu‘ârazadan men‘ olunup mâ hüve’l-vâki‘ bi’t-taleb ketb olundu. Fi’l-yevmi’s-sânî min Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Çelebi b. Rıdvan, Hüseyin Beşe b. Abdullah, Ebûbekir b. Turgud, Muharrem b. Abdullah, Ahmed Çelebi b. Abdullah.