Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 581 Hüküm no: 717 Orijinal metin no: [90b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Âmine bt. Hasan Efendi’nin terekesinin üçte birini cüz okunması için vasiyet ettiği Mahrûse-i Galata müzâfâtından kasaba-i Kasımpaşa’da ( ) mahallesinde sâkin umdetü’l-müderrisîni’l-kirâm bâ‘isü’l-kitâb Mustafa Efendi b. Hasan Efendi meclis-i şer‘-i şerîf-i Ahmedî ve mahfil-i dîn-i münîf-i Muhammedî’de li ebeveyn kız karındaşı olup mahmiye-i İstanbul’da Ayasofya-i Kebîr mahallesinde sâkine iken vefât eden Emine bt. Hasan Efendi nâm hâtunun veresesinden tereke-i vâfiyesine vâzı‘ü’l-yed olan zevci Ahmed Paşa ve sadrî kebîr oğlu Mustafa mahzarlarında üzerlerine da‘vâ ve takrîr-i kelâm edip müteveffât-ı mezbûre hayâtında sülüs malından beş yüz esedî guruş ifrâz olunup meblağ-ı mezbûrdan kadr-i kifâye techîz ve tekfînine harc olunandan bâkī her ne kalırsa vakf olunup gallesi ile kasaba-i mezbûrda Gedik Abdi mescidi’nde rûhu için yevmî ikişer akçe vazîfe ile kifâyet ettiği mikdâr eczâ-i şerîfe tilâvet ettirile deyû vasiyyet edip tenfîzine beni vasiyy-i muhtâr nasb ve ihtiyâr ettikden sonra musırraten fevt olup sülüs malı vesâyâsına müsâ‘id olduğundan gayrı mezbûrân Ahmed Bey ve Mustafa Bey vasiyyet-i mezbûreyi tahrîr etmişlerdir suâl olunup ihkāk-ı hak [91a] olunmak matlûbumdur dedikde gıbbe’s-suâl mezbûrân Ahmed Paşa ve Mustafa Bey kaziyye minvâl-i muharrer üzre olduğunu tâyi‘an ikrâr ve i‘tirâf etmeğin mûcebince ba‘de’l-hükm mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Fahrü’l-emâcid ve’l-ekârim Ahmed Paşa b. Kara Hoca, fahrü’l-a‘yân Mustafa Bey b. Hüseyin Efendi, fahrü’l-müderrisîn Halil b. Hasan, zahrü’l-akrân Receb Ağa, el-Hâc Hasan b. Musli, el-Hâc Abdurrahman b. Mesud.