Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 582 Hüküm no: 718 Orijinal metin no: [91a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Mustafa’nın câriyesi Hatice bt. Abdullah’ı vasiyet yoluyla âzat ettiği Mahmiye-i İstanbul’da Kalenderhâne mahallesi sükkânından Sâliha bt. Mustafa nâm hâtun meclis-i şer‘-i hatîr-i lâzımü’t-tevkīrde ikrâr ve takrîr-i kelâm edip bana rıkkıyyetini mu‘terife olan işbu açık kaşlı, koyun elâ gözlü, orta boylu, Gürciyyetü’l-asl bâ‘isetü’l-kitâb Hatice bt. Abdullah nâm câriye-i memlûkemi vefâtımdan kırk gün mukaddem âzâd olmak üzre tedbîr-i mukayyed ile müdebbere eyledim vaktâ ki kazâ-i nahb eylediğimde kayd-ı mezbûr bulunursa mevsûfe-i mezbûre cemî‘ malımdan âzâd olup harâir-i asliyyât gibi hürre olsun dedikde mâ hüve’l-vâki‘ bi’t-taleb ketb olundu. Fi’l-yevmi’s-sâdis min Ramazâni’l-mübârek li sene seb‘a ve seb‘în ve elf. Şuhûdü’l-hâl: İlyas Halîfe b. Rıdvan el-Müezzin, Abdülbâkī b. el-Hâc Osman, Veli b. Mahmud, Hüseyin b. Mustafa, Resul [b.] Rıdvan.