Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 582 Hüküm no: 719 Orijinal metin no: [91a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Abdülkerim b. Abdi’nin el-Hâc Mehmed b. Mehmed’deki alacağını kızı Meryem Hatun’un tahsil ettiği Mahmiye-i İstanbul’da Yedikule kurbunda Hacı Evhad mahallesinde sâkin iken fevt olan Abdülkerim b. Abdi nâm müteveffânın sulbiye kebîre kızı ve hasren vârisesi Meryem Hâtun meclis-i şer‘-i şerîf-i lâzımü’t-tevkīrde işbu bâ‘isü’l-kitâb el-Hâc Mehmed b. Mehmed nâm kimesne mahzarında ikrâr ve takrîr-i kelâm edip mezbûr el-Hâc Mehmed Ayasofya-i Kebîr vakfı’ndan Yedikule’de lede’l-ahâlî ve’l-cîrân ma‘lûmü’l-hudûd olup icâreteyn-i ma‘lûmeteyn ile mezbûr el-Hâc Mehmed’in taht-ı tasarrufunda olan debbâğhâne dükkânını babam müteveffâ-yı mezbûra hâl-i sıhhatinde on bin akçe bedel mukābelesinde ferâğ edip bedel-i mezkûrdan üç bin beş yüz akçesini babam mezbûr Abdülkerim yedinden ahz u kabz eyledikden sonra izn-i mütevellî bulunmamağla mezbûr el-Hâc Mehmed dükkân-ı mezbûru âhara ferâğ edip meblağ-ı mezbûr üç bin beş yüz akçe zimmetinde kalmağın meblağ-ı mezbûru merkūm el-Hâc Mehmed’den da‘vâ ve taleb eylediğimde inkâr etmekle beynimizde münâza‘ât-ı kesîre vakı‘a olmuşidi el-hâletü hâzihî muslihûn tavassut edip mezbûr el-Hâc Mehmed ile beynimizde bin beş yüz akçe üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr bin beş yüz akçeyi merkūm el-Hâc Mehmed yedinden tamâmen ahz edip husûs-ı mezbûra müte‘allika da‘vâdan mezbûr el-Hâc Mehmed’in zimmetini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Bey b. Abdullah, Mehmed b. Ramazan, İbrahim b. Ahmed, Veli Bey b. ( ), Abdi Çelebi b. ( ).