Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 583 Hüküm no: 720 Orijinal metin no: [91a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah’ın, Ahmed Bey b. Hasan’ın odasına girip paralarını çaldığını kabul ettiği Hâssa bostancılarından bâ‘isü’l-kitâb Ahmed Bey b. Hasan nâm kimesne meclis-i şer‘-i şerîfde sâbıkan hizmetkârı olan Mehmed b. Abdullah nâm kimesne mahzarında üzerine da‘vâ ve takrîr-i kelâm edip mezbûr Mehmed hizmetkârım iken târih-i kitâbdan yirmi iki gün mukaddem Çarşamba gecesi Hasbahçe’de bostancılar odalarında berberhâne demekle ma‘rûf odamda olan sepetimi fuzûlen açıp içinde olan yüz seksen guruşumu ahz u kabz etmişdir suâl olunup ihkāk-ı hâk olunmak matlûbumdur dedikde gıbbe’s-suâl mezbûr Mehmed cevâbında müdde‘î-i mezbûrun vech-i mübeyyen üzre sepetini açıp içinde olan yüz seksen guruşunu ahz u kabz edip Mehmed Bey b. Ahmed nâm bostânîye vermişdir deyû tav‘an ikrâr etmeğin mûcebince meblağ-ı mezbûrun aynını müdde‘î-i mezbûra teslîme müstehlek ise misli yüz seksen guruşu müdde‘î-i mezbûra zâmin olmak üzre mezbûr Mehmed’e tenbîh olunmağın mâ vaka‘a bi’t-taleb ketb olundu. Fi’l-yevmi’s-sâbi‘ min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Fahrü’l-emâsil Ömer Bey b. Mustafa, fahrü’l-müderrisîn Abdülbâkī Çelebi, Hasan Beşe b. Abdullah, Hasan Çelebi b. Ahmed, Süleyman b. Veli, es-Seyyid Süleyman Efendi b. Es-Seyyid Ali, Mustafa Efendi [b.] Hürrem.