Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 583 Hüküm no: 721 Orijinal metin no: [91a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Ağa’nın, Eflak voyvodası ve adamlarına ödünç para verdiği Husûs-ı âti’l-beyânın mahallinde tahrîri iltimâs olunmağın savb-ı şer‘-i celîl-i lâzımü’t-tebcîlden mevlânâ Ömer Efendi b. İsmail irsâl olunup ol dahi Dârü’l-hilâfeti’l-aliyye Kostantıniyye el-mahmiyye mahallâtından Kasab İvaz mahallesinde sâbıkan zağarcıbaşı olan umdetü’l-emâcid ve’l-ekârim câmi‘ü’l-mehâmid ve’l-mekârim Osman Ağa’nın menziline varıp zeyl-i rakīmde isimleri terkīm olunan müslimîn mahzarlarında akd-i meclis-i şer‘-i mübîn eyledikde kendi taraflarından asîl ve gāibûn ani’l-meclis olup bi’l-fi‘l Eflak voyvodası olan Rado v. Po’nun sâbıkan banı olan Rado v. İstayko ve verenikos olan Mariş ve kolicari olan Koliçe v. İnco ve istari olan Dragic v. Kostantin ve posnifos olan Şarban ve Kostantin ve Sofyalı Nikola Manol ve Matay v. İsterye ve kolisi olan Yorgi v. Yuvan ve mütesellimi olan Laskaraki v. Manol taraflarından vekîl olup mîrî sürücü Anastas v. Adam ve Dimitri v. Yani nâm zimmîler şehâdetleriyle şer‘an sâbit olup mezbûr voyvodanın hâliyâ banı olan Yorgi v. Praşko ve logofeni olan Rado v. Harçeleşko ve armaşi olan Pano v. Şipo ve ştareri olan Zoye v. Filib’den her biri meclis-i ma‘kūd-ı mezbûrda mûmâ-ileyh Osman Ağa mahzarında asâleten ve vekâleten ikrâr ve takrîr-i kelâm edip dest-i hattımız ile mûmâ-ileyh Osman Ağa yedine verdiğimiz temessükümüz nâtık olduğu üzre müşârün-ileyh Osman Ağa’ya cihet-i karzdan on beş bin kıt‘a esedî guruş ve semeni târih-i kitâbdan dokuz ay tamâmına değin müeccel ve mev‘ûd on altısı la‘l ve üçü yâkut cem‘an on dokuz bin kıt‘a esedî guruş vâcibü’l-edâ ve lâzımü’l-kazâ deynimiz olup her birimiz meblağ-ı mezbûrdan âharın zimmetine lâzım gelene kefîl ve zâmin olmuşuzdur dediklerinde gıbbe’t-tasdîki’l-mu‘teber husûs-ı mezbûru mevlânâ-yı mezbûr mahalline tahrîr ve ba‘dehû ma‘an irsâl olunan Hasan Çelebi ile meclis-i şer‘-i hatîre gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fî selhi Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Umdetü erbâbi’t-tahrîr ve’l-kalem yazıcı el-Hâc Mehmed Efendi b. Oruc Ağa, zübdetü ashâbi’t-tastîr ve’r-rakam Abdullah Efendi b. Abdürrahim, umdetü’l-emâsil ve’l-a‘yân Vâni Mustafa Efendi b. İsmail, fahrü’l-eşbâh el-Hâc Ali b. Mehmed, Ali Halîfe b. Ömer, hazînedâr Ali Çelebi b. Ahmed, fahrü’l-akrân Mirza Çelebi b. 56. C[emâ‘at], Osman Beşe b. Abdullah 56. C[emâ‘at], Selim Beşe b. Abdullah 56. C[emâ‘at], Kefevî Hoca b. Mustafa Efendi.