Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 585 Hüküm no: 723 Orijinal metin no: [91a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Âmine Hatun bt. Hasan Efendi’nin terekesinin, kocası Ahmed Paşa, oğlu Mustafa Bey ve kızları Âişe ve Safiye arasında taksimi Mahmiye-i İstanbul’da Ayasofya-i Kebîr mahallesi sâkinelerinden iken bundan akdem vefât eden Âmine Hâtun bt. Hasan Efendi’nin verâseti zevc-i metrûkü Ahmed Paşa ve sadrî kebîr oğlu Mustafa Bey ve sadriye kebîre kızları Âişe ve Safiye’ye münhasıra ve terekesinin on atlı sehimden dört sehmi mûmâ-ileyh Ahmed Paşa’ya ve altı sehmi mezbûr Mustafa Bey’e ve üçer sehmi mezbûretân Âişe ve Safiye’den her birine isâbet ettiği şer‘an mütehakkik oldukdan sonra ve mûmâ-ileyh Ahmed Paşa meclis-i şer‘-i şerîf-i Ahmedî ve mahfil-i dîn-i münîf-i Muhammedî’de mezbûretân Âişe ve Safiye’nin halleri ve taraflarından husûs-ı âti’l-beyâna vekîlleri olduğu zâtlarını ma‘rifet-i şer‘iyye ile ârifân Abdi Bey b. Ahmed ve Receb Çelebi b. Ali nâm kimesneler şehâdetleri ile şer‘an sâbit olan umdetü’l-müderrisîni’l-kirâm Mustafa Efendi ile mezbûr Mustafa Bey mahzarlarında ikrâr ve takrîr-i kelâm edip müteveffât-ı mezbûrenin, mezbûre Âişe’ye deyni olan yedi yüz esedî guruşdan ve Ahmed Efendi’ye deyni olan [91b] iki bin iki yüz akçeden ve bakkal ( ) deyni olan üç bin akçeden ve Oruc Ağa’ya deyni olan üç bin akçeden ve bakkal Franko’ya deyni olan üç bin guruşdan ve Mehmed nâm kimesneye deyni olan elli şerîfi ve iki yaldız altınından benim rub‘ hisseme isâbet edene mezbûretân Âişe ve Safiye ile mezbûr Mustafa Bey zâmin olup müteveffât-ı mezbûrenin zimem-i nâsda olan düyûnu alâ hâlihî sâir verese ile beynimizde durmak üzre müteveffât-ı mezbûrenin terekesinden sihâm mezbûreden dört sehim hissem mukābelesinde mezbûrûn Mustafa Bey ve Âişe ve Safiye ile bi tarîki’t-tehârüci’ş-şer‘î bin üç yüz esedî guruş üzerine sulh olup bedel-i sulh-i mezbûrun iki yüz esedî guruşum mezbûrlardan nakid alıp ve beş yüz esedî guruşu için hâzır bi’l-meclis beş yüz esedî guruş dâyinim olan Halil Bey’i cümlemiz bir meclisde iken mezbûrûn Mustafa Bey ve Âişe ve Safiye üzerlerine havâle-i sahîha-i şer‘iyye ile havâle edip anlar dahi havâleyi kabûl edip ve altı yüz guruşunu dahi müteveffât-ı mezbûrenin zimmetimde mehir deyni olan sekiz yüz guruşdan mezbûrûn Mustafa ve Âişe ve Safiye’nin hisseleri olan altı yüz esedî guruşa takās edip anlar dahi mukāssa ve kabûl ettiklerinden sonra mezbûrûn Mustafa Bey ve Âişe ve Safiye ile tereke-i müteveffât-ı mezbûreye müte‘allika cemî‘ de‘âvîden her birimiz âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledik dedikde vekîl-i müşârün-ileyh ile mezbûr Mustafa Bey dahi mukırr-ı mûmâ-ileyhi cemî‘ kelimâtında vicâhen tasdîk etmeğin mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Emîrü’l-ümerâ’i’l-kirâm Ahmed Paşa b. el-merhûm Kara Hoca, fahrü’l-a‘yân ve’l-ekfâ Mustafa b. Hüseyin Efendi, fahrü’l-müderrisîn Halil Efendi [b.] Hasan, fahrü’l-emâcid ve’l-akrân Receb Ağa b. Ali, el-Hâc Hasan b. Musli, el-Hâc Abdurrahman b. Mesud, Mehmed b. İbrahim, Mehmed Beşe b. İbrahim el-Mübâşir, Receb b. Ali, Hüseyin Efendi b. Mustafa.