Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 586 Hüküm no: 724 Orijinal metin no: [91b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bayramiye şeyhi Pîr Mehmed Efendi’nin atalarına vakfedilen eve el koyan Veli Efendi b. Hüsameddin’in haksız olduğu Mahrûse-i Galata müzâfâtından kasaba-i Kasımpaşa’da Küçük Piyâle Paşa mahallesinde sâkin ve tarîkat-i meşâyihden Bayramiyye tarîkinde olup vech-i âtî üzre da‘vâya memûr olan bâ‘isü’l-kitâb Pîr Mehmed Efendi b. İshak meclis-i şer‘-i şerîf-i Ahmedî ve mahfil-i dîn-i münîf-i Muhammedî’de zikri âtî menzile vâzı‘ü’l-yed olduğu şer‘an sâbit olan Veli Efendi b. Hüsameddin nâm kimesne mahzarında üzerine da‘vâ ve takrîr-i kelâm edip mahalle-i mezbûrda vâki‘ hâlâ etrâf-ı erba‘adan tarîk-i âm ve bostan ve Piyâle Paşa mescid haremi ve Sefer Kethüdâ mektebi ve benim mülk menzilim ile mahdûd büyût-ı adîde ve zâviye ve hadîkayı müştemil menzil Kurd Bey b. Abdülcebbâr nâm sâhibü’l-hayrın yedimde olan vakfiye-i ma‘mûlün-bihâsı nâtıka olduğu üzre süknâsı tarîkat-i mezbûrede olan ceddim merhûm eş-Şeyh Ali Efendi b. Dede Bey’e ba‘de vefâtihî evlâdına ve evlâdına ve evlâd-ı evlâd-ı evlâdına meşrûtiyyet vakfı olup ben şeyh-i mezbûr Ali Efendi’nin oğlu İshak’ın oğlu olmağla menzil-i mezbûrun süknâsı bana meşrûta iken mezbûr Veli Efendi bi gayrı hakkın menzil-i mezbûra vaz‘-ı yed eder suâl olunup kasr-ı yedine ve bana teslîme tenbîh olunmak matlûbumdur deyû mazmûnu min külli’l-vücûh takrîr-i meşrûhunu nâtıka vakfiye-i ma‘mûlün-bihâ ibrâz etmeğin gıbbe’s-suâl mezbûr Veli Efendi menzil-i mezbûrun süknâsı vâkıf-ı mezbûrun vech-i muharrer üzre şeyh-i mezbûr Ali Efendi’ye ba‘dehû evlâdına ve evlâd-ı evlâdına ve evlâd-ı evlâd-ı evlâdına meşrûta vakfı olup müdde‘î-i mezbûr Pîr Mehmed Efendi dahi şeyh-i mezbûr Ali Efendi’nin evlâd-ı evlâdından olup menzil-i mezbûrun süknâsı hakk-ı meşrûtu olduğunu ikrâr ve zeyl-i rakīmde muharrerü’l-esâmî olan müslimîn dahi ihbâr etmeğin mûcebince menzil-i mezbûrdan kasr-ı yedine ve müdde‘î-i mezbûra şart-ı vâkıf üzre teslîmine mezbûr Veli Efendi’ye tenbîh olunmağın mâ vaka‘a bi’t-taleb ketb olundu. Fi’l-yevmi’s-sânî min Ramazâni’l-mübârek li sene seb‘a ve seb‘în ve elf. Şuhûdü’l-hâl: Umdetü’l-mehâdimü’l-kirâm ve’l-müderrisîn-i’l-fihâm Mustafa Efendi, umdetü’s-sâdâti’l-kirâm es-Seyyid Mehmed b. Mesud Efendi, Fahrü’s-sâdâti’l-kirâm eş-Şeyh Cafer Efendi, Ahmed Efendi b. Hacı Hasan, Ömer Efendi [b.] Veli el-İmâm.