Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 587 Hüküm no: 727 Orijinal metin no: [91b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eski vakıf menzilin yeniden yapılması şartıyla Mehmed Çelebi b. Ali’ye verildiği Dârü’l-hilâfeti’l-aliyye Kostantıniyye el-mahmiyye mahallâtından Akseki mahallesi mescid-i şerîfi ve ma‘bed-i latîfinin bi’l-fi‘l müezzini olan işbu bâ‘isü’l-kitâb Mehmed Çelebi b. Ali nâm kimesne meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda takrîr-i kelâm edip mahalle-i mezbûrede vâki‘ merhûm Dal Mehmed Efendi nâm sâhibü’l-hayrın gallesi mescid-i şerîf-i mezkûrda müezzin olanlara meşrûta vakfı olup bir tarafdan haffâf Mehmed Çelebi mülkü ve bir tarafdan Belkıs Hâtun mülkü ve bir tarafdan ba‘zen mescid-i şerîf-i mezkûrda imâm olanlara meşrûta vakıf menzili ve ba‘zen müezzin olanlara meşrûta âhar vakıf menzil ve bir tarafdan tarîk-i âm ile mahdûd menzil, mürûr-ı eyyâm ile kürûr-ı a‘vâm ile bi’l-külliye harâb olup bir vechile kābil-i süknâ olmamağın müceddeden binâ olunmak lâzım geldikde cânib-i vakıfda binâya müsâ‘ade olmamağın ba‘de’l-keşf ve’t-tahmîn arsasına yevmî bir akçe icâre-i müeccele ile ta‘yîn olundukdan sonra vakf-ı mezbûrun bi’l-fi‘l mütevellîsi olan Ahmed Çelebi menzil-i mahdûd-ı mezkûru kendi malım ile mülküm olmak üzre nefsim için binâya târih-i kitâb şehri gurresinde bana izin verip yedime temessük vermişdir, nazar olunup mûcebince cânib-i şer‘-i şerîfden istihkâmen yedime hüccet verilmek matlûbumdur deyû mazmûnu min külli’l-vücûh takrîr-i meşrûhuna muvâfık ve târih-i mezbûr ile müverrah ve mütevellî-i mezbûrun imzâ ve hatmini hâvî temessük ibrâz etmeğin mûcebince cânib-i şer‘-i hatîr-i lâzımü’t-tevkīrden li ecli’l-istihkâm işbu vesîka-i enîka ketb ve imlâ olundu. Fi’l-yevmi’r-râbi‘ min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, İbrahim Çelebi b. Mehmed, Hasan Çelebi b. Ahmed, Mehmed Bey b. Ramazan.