Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 588 Hüküm no: 729 Orijinal metin no: [92a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Receb’in, eski kocası Hasan b. Hasan’daki alacağını tahsil ettiği Vilâyet-i Anadolu’da Torbalı Köşk kasabası mahallâtından Çeşme mahallesi sâkinelerinden Fâtıma bt. Receb nâm hâtun meclis-i şer‘-i şerîf-i lâzımü’t-teşrîfde zevc-i sâbıkı bâ‘isü’l-kitâb Hasan b. Hasan nâm kimesne mahzarında ikrâr ve takrîr-i kelâm edip târih-i kitâbdan on ay mukaddem mezbûr Hasan beni bâyinen tatlîk etmeğin zimmetinde mütekarrir ve ma‘kūdun-aleyh olan üç yüz akçe mehr-i müeccelimi ve mezbûr Hasan’ın firâşından mütevellid sagīr oğlum Osman ve sagīre kızım Meryem’in nafakaları için bin yetmiş altı senesi Zilka‘desi’nin evâsıtında mezbûr Hasan üzerine farz ve takdîr olunan yevmî on ikişer akçeden târih-i kitâba gelince müctemi‘ olan üç bin dört yüz seksen akçenin iki yüz akçesini işbu meclisde mezbûr Hasan yedinden ahz u kabz edip meblağ-ı bâkī iki bin iki yüz seksen akçeyi mezbûr Hasan’ın eşyâ-i memlûkesinden fuzûlen bey‘ ile istihlâk ettiğim biri mâî ve biri kırmızı iki kilim ve iki yorgan ve bir ibrik ve bir çarşaf ve biri kırmızı biri bâzincânî iki kaftanın mecmû‘ kıymetleri olan iki bin iki yüz seksen akçeye takās edip ol dahi mukāssa ettikden sonra hukūk-ı zevciyyete târih-i kitâba gelince beynimizde cârî olan ahz ve i‘tâya müte‘allika âmme-i hukūk-ı ma‘lûme ve mechûle da‘vâsından [her] birimiz âharın zimmetini ibrâ ve iskāt ettik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis min Ramazâni’l-mübârek li sene seb‘a ve seb‘în ve elf. Şuhûdü’l-hâl: Hasan Çavuş b. Mehmed el-Mübâşir, Hasan Çelebi b. Ahmed, İbrahim b. Ahmed, Hasan b. Ahmed, Mehmed b. Ramazan.