Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 589 Hüküm no: 730 Orijinal metin no: [92a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Ali b. Tayyib’in, Meryem bt. Cafer’deki ev satışından kalan alacağının karısı ve kızları tarafından tahsil edildiği Mahmiye-i İstanbul’da Koca Mustafa Paşa mahallesinde sâkin iken bundan akdem vefât eden Ali b. Tayyib’in verâseti zevce-i metrûkesi Fâtıma bt. Murad ve kebîre kızları Hatice ve Afîfe ve sagīre kızı Vâhide’ye münhasıra ve mezbûre Fâtıma sagīre-i mezbûrenin vasîsi olduğu şer‘an sâbit oldukdan sonra mezbûre Fâtıma asâleten ve vesâyeten ve mezbûretân Hatice ve Afîfe asâleten meclis-i şer‘-i şerîfede Meryem bt. Cafer nâm hâtun mahzarında her biri üzerine da‘vâ ve takrîr-i kelâm edip müteveffâ-yı mezbûr hayâtında merhûm el-Hâc Evhad vakfı’ndan olup mahmiye-i mezbûrda Canbâziye mahallesinde vâki‘ bir tarafdan Mehmed Çelebi ve bir tarafdan Timurhan Hâtun menzilleri ve bir tarafdan mekteb ve bir tarafdan tarîk-i âm ile mahdûd üç bâb tahtânî odaları ve ahır ve hadîkayı müştemil icâre-i mu‘accele-i ma‘lûme ve ayda otuz akçe ücret-i müeccele ile tasarrufunda olan menzilini bin yetmiş senesi Ramazân-ı şerîfi gurresinde mezbûre Meryem’e otuz beş bin akçe bedel mukābelesinde izn-i mütevellî ile ferâğ ve tefvîz ve teslîm edip mezbûre dahi tefevvuz ve tesellüm ettikden sonra bedel-i mezbûrun on dört bin akçesini müteveffâ-yı mezbûr hayâtında edâ edip bâkī yirmi bir bin akçesi zimmetinde kalmağın suâl olunup meblağ-ı bâkī-i mezbûrun mezbûre Meryem’den alıverilmesi matlûbumdur dediklerinde gıbbe’s-suâl mezbûre Meryem cevâbında müteveffâ-yı mezbûrdan menzil-i mezbûru târih-i mezbûrda izn-i mütevellî ile otuz beş bin akçe bedel ile tefevvuz ve kabûl ettiğimden sonra bedel-i mezbûrun cümlesini müteveffâ-yı mezbûra hayâtında edâ ve îfâ edip ol dahi ahz ve istîfâ etmiş idi deyû def‘le mukābele edicek gıbbe’s-suâl ve’l-inkâr mezbûre Meryem’den def‘-i mezbûreyi mübeyyine beyyine taleb olundukda ityân-ı beyyineden izhâr-ı acz ile istihlâf etmeğin bedel-i mezbûrdan bâkī yirmi bir bin akçeyi müteveffâ-yı mezbûr hayâtında mezbûre Meryem’den küllen ve ba‘zen ahz ve istîfâ ettiğini bilmediğine mezbûrât Fâtıma ve Hatice ve Afîfe’den her birine yemîn teklîf olundukda anlardan her biri dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince meblağ-ı mezbûr yirmi bir bin akçeyi müdde‘iyât-ı mezbûrâta edâya merkūme Meryem’e tenbîh olundukdan sonra mezbûrât Fâtıma ve Hatice ve Afîfe meclis-i mezbûrda merkūme Meryem mahzarında her biri ikrâr ve takrîr-i kelâm edip ânifen edâsına tenbîh olunan meblağ-ı mezbûr yirmi bir bin akçeyi işbu meclisde mezbûre Meryem yedinden tamâmen ahz u kabz eyledik dediklerinde gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sâlis min Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, Yusuf Çelebi b. Abdülmennân, Yusuf b. Hasan, İbrahim b. Receb, Mustafa Çavuş [b.] Yusuf el-Mübâşir, Ahmed Beşe b. Mustafa, Mustafa Ağa b. Mehmed.