Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 590 Hüküm no: 731 Orijinal metin no: [92a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zülfikar Ağa b. Abdullah’ın, Hüseyin Ağa b. Sefer’den alacaklı olduğu Mahmiye-i İstanbul’da Ayasofya-i Kebîr mahallesi sükkânından bâ‘isü’l-kitâb Zülfikār Ağa b. Abdullah nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de mahmiye-i mezbûrda Ali Paşa mahallesi ahâlîsinden olup hâlâ subaşı olan Hüseyin Ağa b. Sefer mahzarında üzerine da‘vâ ve takrîr-i kelâm edip cihet-i karz-ı şer‘îden mezbûr Hüseyin Ağa zimmetinde altmış beş bin akçe hakkım olup hattâ mezbûr Hüseyin Ağa cihet-i mezbûreden bana altmış beş bin akçe deyni olduğunu târih-i kitâb senesi Rebî‘ulâhiri gurresinde ikrâr dahi edip yedime temessük vermişidi, suâl olunup alıverilmek matlûbumdur deyû mazmûnu min külli’l-vücûh takrîr-i meşrûhunu nâtıka mezbûr Hüseyin Ağa’nın hat ve hatmini hâvî deyn temessükü ibrâz etmeğin gıbbe’s-suâl mezbûr Hüseyin Ağa cevâbında müdde‘î-i mezbûra deynim yok iken karzdan altmış beş bin akçe deynim vardır deyû kâziben ikrâr etmişidim deyicek, gıbbe’s-suâl ve’l-inkâr mezbûr Hüseyin Ağa vech-i muharrer üzre ikrârında kâzib olmayıp ve müdde‘î-i mezbûr dahi da‘vâ-yı meşrûhasında mubtıl olmadığına şer‘an müdde‘î-i mezbûra yemîn lâzım gelip lâkin mezbûr Hüseyin Ağa müdde‘î-i mezbûra yemîn dahi verdirmemeğin mûcebince meblağ-ı mezbûru müdde‘î-i mezbûra edâya merkūm Hüseyin Ağa’ya tenbîh olunmağın mâ vaka‘a bi’t-taleb ketb olundu. Fi’l-yevmi’s-sâbi‘ min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: İsmail Ağa b. Mahmud, Yusuf b. Mustafa, Mahmud Efendi b. ( ), Mehmed Çelebi b. ( ).