Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 591 Hüküm no: 732 Orijinal metin no: [92a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. İbrahim’in, Mehmed Paşa oğlu Mustafa Bey’deki alacak davasında sulh olduğu Fi’l-asl vilâyet-i Anadolu’da Eskişehir kasabasından olup hâlâ müsâfiren Ayasofya-i Kebîr mahallesinde sâkin Mehmed Bey b. İbrahim nâm kimesne meclis-i şer‘-i şerîf-i lâzımü’t-teşrîfde bâ‘isü’l-kitâb mefharü’l-[akr]ân Mustafa Bey b. el-merhûm Mehmed Paşa mahzarında ikrâr ve takrîr-i kelâm edip mûmâ-ileyh Mustafa Bey zimmetinde cihet-i karz-ı şer‘îden iki yüz elli esedî guruş mûmâ-ileyh Mustafa Bey’den taleb ve da‘vâ eylediğimde beynimizde münâza‘ât-ı kesîre vakı‘a olmuşdu el-hâletü hâzihî beynimize muslihûn tavassut edip meblağ-ı mezkûr da‘vâsından mûmâ-ileyh Mustafa Bey ile beynimizde yüz yetmiş esedî guruş üzerine sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezkûru mûmâ-ileyh Mustafa Bey yedinden tamâmen alıp kabz edip mâ‘adâdan mûmâ-ileyh Mustafa Bey’in zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîk mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Mustafa Bey b. Abdullah, Mahmud Bey b. Mehmed, Ömer Bey b. ( ) el-Kilârî, Ahmed Bey b. Abdullah, Ebûbekir Beşe b. ( ) er-Râcil, Mehmed b. Mustafa.