Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 592 Hüküm no: 734 Orijinal metin no: [92b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Agop ve Ovanes v. Kirkor’un bağ ve bahçelerini Kiro v. Marat’a sattığı Vilâyet-i Anadolu’da Divriği kazâsında Kesme nâm karye ahâlîsinden Agop ve Ovanes veledey Kirkor nâm zimmîler meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda işbu râfi‘ayi’s-sifr Kesper ve Perik veledey Marat nâm zimmîler muvâcehelerinde her biri ikrâr ve takrîr-i kelâm edip bey‘-i âti’z-zikrin sudûruna değin ale’l-iştirâki’s-seviy yedimizde mülkümüz ve hakkımız olup karye-i mezbûre sınırında ve kireç yolu altında bağlar arasında bir tarafdan dere ve bir tarafdan tarîk-i âm ve tarafeynden Sakanoğlu bağı ve bir tarafdan Karabit bağı ile mahdûd bir kıt‘a bağımızı ve yine karye-i mezbûre sınırında çay kenarında ve kireç karşısında vâki‘ bir tarafdan Sarı Keşiş ve bir tarafdan Perik ve bir tarafdan Holekoğlu bahçeleri ve bir tarafdan çay ile mahdûd bir kıt‘a bahçemizi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile seksen kıt‘a esedî guruşa bi safkatin vâhidetin mezbûrâna Kesper ve Perik’e bey‘ edip anlar dahi ale’l-iştirâki’s-seviy iştirâ ve kabûl eylediklerinden sonra semenleri olan meblağ-ı mezbûr seksen kıt‘a esedî guruşu yedlerinden tamâmen alıp kabz edip zikr olunan bağ ve bahçeyi mahallerinde zabt ve kabza mezbûrân Kesper ve Perik’i taslît eyledik dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâdis min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, İbrahim Beşe b. Mehmed, Hasan Çelebi b. Ahmed, Mehmed Bey b. Ramazan, Baba Resul [b.] Rıdvan.