Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 593 Hüküm no: 736 Orijinal metin no: [92b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Durak Bey b. Mehmed’in câriyesi Âişe’yi âzat ettiği Mahmiye-i İstanbul’da Alayköşkü kurbunda Kareki Hüseyin Çelebi mahallesi sâkinlerinden Durak Bey b. Mehmed nâm kimesne tarafından husûs-ı âti’l-beyâna vekîli olduğu mahalle-i mezbûre sâkinlerinden Ahmed Bey b. Abdurrahman ve Süleyman Çelebi b. Abdullah nâm kimesneler şehâdetleriyle şer‘an sâbit olan Nasuh Bey b. Yusuf nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de ikrâr ve takrîr-i kelâm edip müvekkil-i mezbûr Durak Bey kendiye rıkkıyyetini mu‘terife olan işbu bâ‘isetü’l-kitâb açık kaşlı, elâ gözlü, orta boylu, Rûsiyyetü’l-asl Âişe bt. Abdullah nâm câriye-i memlûkesini hasbeten lillâhi te‘âlâ taleben li merzâti’r-Rabbi’l-a‘lâ tahrîr ve i‘tâk ve zümre-i harâir-i asliyyâta ilhâk eyledi ba‘de’l-yevm mevsûfe-i mezbûre Âişe sâir harâir-i asliyyât gibi hürre olup müvekkil-i mezbûrun hakk-ı velâ-i şer‘îden gayrı üzerinde hak ve alâkası kalmadı dedikde mâ hüve’l-vâki‘ bi’t-taleb ketb olundu. Fi’l-yevmi’s-sâdis min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Fahrü’l-akrân Mehmed Çelebi b. eş-Şeyh Aydın, Mustafa Bey b. Abdullah, Zülfikār Ağa b. Abdullah, el-Hâc Süleyman b. Abdullah, Ahmed b. Abdurrahman, İbrahim Çelebi b. Mustafa, Mehmed Bey b. Ramazan.